به پێی ڕاپۆرته‌كان، ڕۆژی یه‌كشه‌ممه ٣٠ی مانگی پوشپه‌ڕ، ناوەندی ڕاگەیاندنی هێزەكانی پاراستنی هەپەگە ڕایگەیاند، لە چالاكی گەریلاکانی پەکەکەدا لە ناوچەی “شەمزینان”ی جولەمێرگ چوار سەربازی توركییه كوژران.
لە ڕاگەیەندراوەکەی هەپەگەدا ئاماژە بۆ ئەوە کراوە، گەریلاکانیان لەدژی سپای تورکییه بارهەڵگرێکی سەربازییان كە بەرەو هەرێمی ئاڤاشین دەچووە تێکشکاندووە و چوار سەرباز کوژراون و دوو سەربازی دیکەش برینداربوون. هاوکات ئاماژە بۆ ئەوەشکراوە، هێزەکانیان لەنێوان گردی خاپووشكێی شەمزینان و گردی هەلیكۆپتەردا ئۆتۆمبیلێكی سەربازی سپای توركییه‌یان تێکشکاندووە، بەڵام ژمارەی كوژراوو بریندارەكان نەزانراوە.