به سه‌دان كه‌س له خۆپیشانده‌ران ناسراو به جلیقه زه‌رده‌كان ڕۆژی یه‌كشه‌ممه ٢٣ی مانگی پووشپه‌ڕ، له ڕۆژی نه‌ته‌وه‌یی فه‌ڕانسه له حه‌ره‌كه‌تێكی ناڕه‌زایه‌تییدا له شاری پاریس هاتنه سه‌ر شه‌قامه‌كان و له شه‌قامی شانزه‌لیزه خۆپیشاندانیان ئه‌نجام دا.
ناڕازییان كه به‌نیاز بوون ئه‌و ڕێوڕه‌سمه كه “ئێمانۆئێل مه‌كرۆن” سه‌رۆك كۆماری فه‌ڕانسه تێیدا به‌شداری كردبوو په‌ك بخه‌ن، له‌گه‌ڵ هێزه‌كانی پۆلیس به‌ره‌وڕوو بوونه‌وه و به‌هۆیه‌وه تێكهه‌ڵچوون له نێوانیاندا هاته ئاراوه. شایانی باسه، هێزه‌كانی پۆلیس بۆ بڵاوه‌پێكردن به ناڕازییان له گازی فرمێسكڕێژ و ئێسپره‌ی بیبار كه‌ڵكیان وه‌رگرتووه. جێگه‌ی ئاماژه‌یه، جلیقه زه‌رده‌كان ماوه‌ی چه‌ندین مانگه كه به‌رده‌وام هه‌موو شه‌ممه‌یه‌ك دێنه سه‌ر شه‌قامه‌كان و له ناڕه‌زایه‌تیی به نایه‌كسانی و كه‌لێنی نێوان سه‌رمایه‌داران و هه‌ژاران خۆپیشاندان ئه‌نجام ده‌ده‌ن. ئه‌مه له‌حاڵێكدایه كه جلیقه زه‌رده‌كان ڕایانگه‌یاندبوو كه له ڕۆژی نه‌ته‌وه‌یی فه‌ڕانسه‌ش دێنه سه‌ر شه‌قامه‌كان و خۆپیشاندان ده‌كه‌ن.