بەپێی دوایین هەواڵەکان، هێرشەکانی حووسییەکانی یەمەن بۆ سەر دوو فڕۆکەخانەی عەرەبستانی سعوودی سێ کوژراو و ٣٦ برینداری لێکەوتووەتەوە و لە هەمان کاتدا فڕۆکەخانەی نێودەوڵەتیی عەدەن لە یەمەنیش بووەتە ئامانجی مووشەک و درۆنی.
ڕێکخراوی فڕۆکەوانیی عەرەبستانی سعوودی ڕایگەیاندووە کە لە هێرش بۆ سەر فڕۆکەخانەی نێودەوڵەتیی مەلیک خالید لە ڕیاز، کەسێک کوژراوە و هەشت کەس بریندار بوون و لە هێرشێکی دیکە بۆ سەر دامەزراوەکانی فڕۆکەخانەی ئەبهاش، دوو کەس کوژراون و ٢٨ کەسی دیکە بریندار بوون. یەحیا سەریع، وتەبێژی سەربازیی حووسییەکان، بەرپرسیارێتیی هێرشەکەی سەر فڕۆکەخانەی ڕیازی لە ئەستۆ گرتووە و ڕایگەیاندووە چەند درۆنێک لە ئۆپەراسیۆنەکەدا بەکار هێنراون. لە هەمان کاتدا حووسیەکانی یەمەن هێرشیان بۆ سەر فڕۆکەخانەی ئەبها و بنکەی ئاسمانیی خەمیس مەشیت ڕاگەیاندووە. لە یەمەنیش فڕۆکەخانەی نێودەوڵەتیی عەدەن، کە گرنگترین دەروازەی ئاسمانیی ناوچەکانی ژێر کۆنترۆڵی حکومەتی عەدەنە، بووەتە ئامانج.