لە مانگی سێپتامبری ئەمساڵدا، دۆخی مافی مرۆڤ لە کوردستان هاوکات بووە لەگەڵ بەرزکردنەوەی بەرچاوی ڕێژەی گوشاری ئەمنی و قەزایی بۆ سەر هاووڵاتییان.
لەو ماوەیەدا، ٧٢ هاووڵاتیی کورد لەلایەن هێزەکانی حکوومەتەوە بە بیانووی بەشداری لە چاڵاکیی مەدەنی، ڕاگەیاندنی و سیاسی دەستبەسەر کراون. هەروەها بۆ ١٠ دەستبەسەرکراو حوکمی زیندان بە کۆی ٤٣ ساڵ دەرچووە و دوو هاووڵاتیی دیکە لەسێدارە دراون، کە بەم شێوەیە ژمارەی لەسێدارەدانی هاووڵاتییان لە کوردستان لە سەرەتای ساڵی ٢٠٢٦ەوە، دەگاتە ٦٤ کەس. لە هەمان ماوەدا دوو ژن لەلایەن ئەندامانی بنەماڵەکانیانەوە کوژراون و پێنج ژنی دیکە بە شێوەیەکی گومانلێکراو گیانیان لەدەست داوە و هەشت ژنی دیکەش لەلایەن دەزگا ئەمنییەکانەوە دەستبەسەر کراون. پێویسته بگوترێ که لە چوارەمین ساڵیادی شۆڕشی ژن، ژیان، ئازادی، لە ١٧ شاری کوردستاندا، هاووڵاتییان لە پیشە جیاوازەکان مانیان گرت و دووکانەکانیان داخست. بەپێی دوایین زانیارییەکان، پاش ئەم مانگرتنە، هێزەکانی ئیتلاعاتی سوپای پاسداران ڕێژەی گوشار و هەڕەشەیان لەسەر بازاڕییان زیاد کردووە و بە داخستنی دووکان و هەڵوەشاندنەوەی مۆڵەتی کار، هەوڵیان داوه تۆڵە لە خەڵک بکەنەوە.