لە تاوانێکی دیکەی دژ بە سروشت و ژینگەی کوردستان، زیاتر لە ٢٠٠ دار بەڕووی بەتەمەن لە گوندێکی شاری بانە لە لایەن کەسانی هەلپەرست و زەویخۆرەوە بڕدراونەتەوە.
بەپێی ڕاپۆرتی ئەنجومەنی پاژینی بانە، لە ماوەی کەمتر لە مانگێکدا زیاتر لە ٢٠٠ چڵ دار بەڕوو لە گوندی شەڕگە، بە مەبەستی داگیرکردنی زەوی و دروستکردنی باخی تایبەت بڕدراونەتەوە و لەناو براون. ئەم ڕێکخراوە ژینگەییە ئاماژەی بەوە کردووە کە سەرەڕای ئاگادارکردنەوەی پێشوەختەی ئیدارەی سەرچاوە سروشتییەکان بۆ ڕێگریکردن لەم تاوانە، بەڵام هیچ هەنگاوێک نەنراوە و پاش تێپەڕبوونی کەمتر لە مانگێک، دەرکەوتووە کە سەرجەم ئەو دارانە بڕدراونەتەوە و زەوییەکەیان کێڵاوە و هیچ شوێنەوارێکیان نەهێشتووە. ئەمە تەنیا یەکێکە لەو هەزاران تاوانەی کە ڕۆژانە دژ بە ژینگەی ناوچەی بانە ئەنجام دەدرێت و دامەزراوەکانی ڕژیمیش بەتەواوی کەمتەرخەم و بێباکن.