کۆمەڵە_رێكخراوی كوردستانی حیزبی كۆمونیستی ئیران
به‌لگه‌ نامه‌كان

بڕیارنامەی کۆنگرەی ١٨ی کۆمەڵە سەبارەت بە خەباتی یەکگرتووانەی مامۆستایان

 

1-    کۆمەڵگای ئێران لەبەردەم ئاڵ و گۆڕێکی چارەنووس سازدایە. لەلایەکەوە بێکاری، قووڵتر بوونەوەی کەلێنی چینایەتی، پەرەسەندنی وایرۆسی کڕۆنا هاوکات لەگەڵ سەرکوتی خوێناوی و بێبەزەییانە، لەلایەکیترەوە ناڕەزایەتی، مانگرتنی هەرڕۆژە، نەفرەت و بێزاری لە کۆماری ئیسلامی و هیوا بە کۆتاییهاتن بە دەسەڵاتە فاشیستییەکەی، وێنایەکە لە کۆمەڵگای ئەمڕۆی ئێران. ناڕەزایەتی و مانگرتنە کرێکارییەکان، خانەنشین کراوان، مانگرتن و کۆبوونەوەی سەراسەری و یەکگرتووانەی مامۆستایان لە سەرەوەی خەبات و بەربەرەکانێ لە دژی کۆماری ئیسلامیدان.

2-    بزوتنەوەی ئەمڕؤی مامۆستایان وەک بەشێک لە چینی کرێکار، رێکخراوترین و یەکگرتووانەترین بەشی ئەو چینە، لە حەرەکەتێکی سەراسەری و بەردەوامدا بۆ بەدەست هێنانی ماف و داخوازییە رەواکانی خۆی تێدەکۆشێت. خاڵی بەهێزی بزوتنەوەی مامۆستایان لەچاو بزوتنەوە ناڕەزایەتی و کۆمەڵایەتییەکانی تر بریتییە لە یەکگرتوو بوونی توێژی مامۆستایان و هەبوونی ناوەندێکی رێبەریی وەک ” شۆڕای هاوئاهەنگی رێکخراوە سنفییەکانی فەرهەنگیانی ئێران”. بزوتنەوەی مامۆستایان لە ئاست گرتن و زەبەر و زەنگ و هەڕەشەکانی رژیمدا بەچۆکدا نەهاتووە و فریوی وادە و بەڵێنییە درۆیینەکانی رژیمی نەخواردووە.

3-    داواکاری مامۆستایان بریتییە لە: گەڵاڵەی پۆلێنبەندی، بەرزکردنەوەی حەقدەستی مانگانە، هاوتا کردنی حەقدەستەکان، ئازادی مامۆستایانی دەستبەسەرکراو، فێرکردن و بارهێنای بەخۆڕایی. پشتگوێ خستنی خواست و داواکارییەکانی مامۆستایان، گرتن و زیندانی کردنی هەڵسووڕاوانی پێشڕەوی ئەم بزوتنەوەیە و گەڵاڵەی نیوە و ناتەواو و فریوکارانەی مەجلیس سەبارەت بە “گەڵاڵەی پۆلێنبەندی”، نەیانتوانیوە بزوتنەوەی سەراسەری مامۆستایان خامۆش بکات.

4- هێزی مانگرتن و ناڕەزایەتییەکانی مامۆستایان، جگە لە شێلگیری و بەردەوام بوونیان لەسەر ناڕەزایەتی و مانگرتنەکانی هەتا ئێستایان، لە راکێشانی پشتیوانی و هاوخەباتی بەشەکانی تری بزوتنەوەی کرێکاری، بەتایبەت کرێکارانی ناوەندە پیشەییەکان، لەوانە کرێکارانی ناوەندەکانی بەرهەمهێنانی نەوت و پترۆشیمی، خوێندکاران و بنەماڵەکانیاندایە.

5 –   کۆمەڵە چ لە کوردستان وەک رێکخراوێکی چەپ و شۆڕشگێڕ و چ لە ئاستی سەراسەریدا وەک بەشێک لە حیزبی کۆمۆنیستی ئێران، خۆی بە پشتیوان و هاوخەباتی بێ درێغ و شێلگیری بزوتەوەی حەقخوازانەی مامۆستایان دەزانێت.

کۆنگرەی ١٨ی کۆمەڵە، وێڕای پشتیوانی و پێداگری لەسەر ئازاد بوونی دەستبەجێی مامۆستایانی بەندکاراو و سەرجەم زیندانیانی سیاسی، ڕێزدەگرێت لە ئیرادە و هاوپشتی یەکگرتووانەی مامۆستایان لە ناڕەزایەتی و مانگرتنەکانی هەتا ئێستایان لە سەەراسەری ئێران و لەوانە بەشداری بەرچاو و چالاکانەی مامۆستایانی کوردستان لەو حەرەکەتە رەوا و مافخوازانەیەدا لە ئاست رژیمی سەکوتگەر و جنایەتکاری کۆماری ئیسلامیدا. هەروەها داوا لە کۆمەڵانی خەڵکی شۆڕشگێڕ و ناڕازی کوردستان دەکات چالاکانە و بە شێوەیەکی یەکگرتوو لە خەبات و ناڕەزایەتی بوێرانەی  مامۆستایان پشتیوانی بکەن.

 

کۆنگرەی ١٨ی کۆمەڵە

رێکخراوی کوردستانی حیزبی کۆمۆنیستی ئێران)

بەفرانباری ١٤٠٠ی هەتاوی بەرانبەر لەگەڵ مانگی ژانوییەی ٢٠٢٢

بابەتی پەیوەندیدار

ڕاپۆرتی سیاسی کومیتەی ناوەندی کۆمەڵە بە کۆنگرەی ١٨

-

پەیامی کۆنگرەی ۱٨ کۆمەڵە بۆ بنەماڵەی گیانبەختکردووان

-

پەیامی کۆنگرەی ۱۸ کۆمەڵە بۆ زیندانیانی سیاسی

-

پەیامی کۆنگرەی ١٨ی کۆمەڵە بۆ کرێکارانی ئێران

-

بڕیارنامە سەبارەت بە مەسەلەی نەتەوایەتی كورد وەک مەسەلەیەکی هه‌رێمی

-

بڕیارنامە سەبارەت بە پێویستی یەکگرتووی چەپ لە کوردستان

-