به پێی ڕاپۆرته‌كان، لە هەموو شارەکانی کوردستان، خەڵک بەردەوام و بە شێوازی جیاواز ڕێز لە گیان فیدایی و ماندوونەناسیی پزیشک و پەرستار و کادری دەرمانیی نەخۆشخانەکان دەگرن.
بۆ جارێکی دیکە و ئەمجار لە شاری “شنۆ” سەر بە ئۆستانی ورمێ، “کۆمەڵگای مەدەنی”ی ئەوشارە بە پێدانی “لەوحی ڕێزلێنان” و “گوڵ” بە پزیشک و پەرستار و کادرە دەرمانییەکانی نەخۆشخانەی “نەبی ئەکرەم”، ڕێز و پێزانینی خۆیان بەرانبەر بە هەوڵ و تێکۆشانی ئەو توێژه‌ی کۆمەڵگا نیشان دا. هەروەها کۆمەڵگای مەدەنیی شنۆ ڕایگەیاندووە: گشت پێرسۆنێلی نەخۆشخانەکان لەو ڕۆژانەدا کە کۆرۆنا لە ئەوپەڕی خۆیدا بوو، گیانیان لەسەر دەست دانا و بۆ ڕێزگرتن لە تیکۆشانی ئەوان دەبێ ساڵەهای ساڵ، بە پێوە ڕاوەستین و چەپڵەیان بۆ لێدەین. هەرلەو پەیوەندییەدا، ڕۆژی یەکشەممە، ٦ی مانگی گوڵان، بەشێک لە چالاکانی مەدەنی شاری سنە لە ژێر ناوی کەمپەینی “ژیانەوەی کوردستان” و دەیان چالاکی مەدەنی تر، سەردانی یەکێک لە نەخۆشخانەکانی شاری سنەیان کرد و، بە پێشکەشکردنی گوڵ و لەوحەی ڕێزلێنان ڕێزیان لە زەحمەت و ماندووبوونی ئەو کارمەندانە گرت و سپاس و پێزانینیان ئاڕاستە کردن.