ڕاپۆرته‌كان باس له‌وه ده‌كه‌ن كه بەشێک لە هاوڵاتیانى ناحیەى بازیان سەر بە سلێمانى، ڕۆژی یه‌كشه‌ممه ١٦ی سه‌رماوه‌ز، دژی کەمی هەلی کار و خزمەتگوزارییەکان خۆپیشاندانیان کردووه و رێگەى سەرەکى “کەرکوک – سلێمانی”یان به‌ستووه.
شایانی باسه، به شێوه‌ی هاوكات خۆپیشاندان لە ناحیەی پیرەمەگرون بەڕێوەچووه و له ئه‌نجامیدا خۆپیشاندەران “کۆمیتەی یەكێتی”یان سوتاند و دواتریش گەمارۆی “بارەگای پارتی”یان داوه. ئەوەش لەکاتێکدایە، لە ماوه‌ی چەند رۆژی رابردوودا، خۆپیشاندانی بەشێك له هاوڵاتیان و موچەخۆران لە سلێمانی و چەند ناوچەیەکی دیکەی هه‌رێمی كوردستان، دژی دواكەوتنی موچەكانیان و لێبڕینی موچە و نەبوونی خزمەتگوزاری و هەلی كار بەڕێوەچوو و تیایدا گرژی لە نێوان خۆپیشاندەران و هێزە ئەمنییەكان دروستبوو. هاوکات چەند كەسێک دەستگیركراون و هێزە ئەمنییەكان گازی فرمێسكڕێژیان بەرامبەر خۆپیشاندەران بەكارهێنا و تەقەیان لە بەشێک لە هاوڵاتیانیش كرد.