شۆرای ئەنجومەن و ڕێكخراوە مەدەنییەكانی مەریوان، ڕۆژی هه‌ینی ٣١ی خه‌رمانان، به مه‌به‌ستی پشتیوانی لە ئەنجومەنی سەوزی چیا بەیاننامەیەكیان بڵاو كردەوە و خوازیاری ئازادی بێ شه‌رت و مه‌رجی سێ ئه‌ندامی به‌ندكراوی ئه‌و ڕێكخراوه ژینگه‌پارێزه بوون.
له به‌شێكی ئه‌و به‌یاننامه‌یه‌دا هاتووه، ڕێکەوتی ١٩ی خەرمانانی ئەمساڵ، هێزە نیزامی و ئەمنییەکانی مەریوان، هێرشیان کردە سەر کۆبوونەوەی ساڵانەی ئەنجومەنی سەوزی چیا و بە شێوەیەکی نایاسایی ئامادەبووانی كۆبوونەوەكەیان دەستبەسەر کرد و بوونه هۆی نیگەرانی و ناڕەزایه‌تی خەڵک و ئەندامانی ئه‌و ڕێکخراوەیه. ڕێکخراوە ناحکوومییەكان بە كارگوزارانی سەرەکیی کۆمەڵگەی مەدەنی دادەنرێن و هەمیشە چاوەڕوانی ئەوە دەکەن دامەزراوە نیزامی و ئەمنییەکان مافی هاووڵاتیان بپارێزن. ئێمە ئه‌نجومەن و ڕێكخراوە مەدەنییەكانی مەریوان به توندی ئەو کاره نایاسایی و نائەخلاقییه مەحکووم دەكەین و داوا ده‌كه‌ین به‌ندكراوان به زووترین كات ئازاد بكرێن.