به پێی ڕاپۆرته‌كان، کۆڵبەرێکی خەڵکی شاری بانە لە ناوچە سنوورییەکانی ئەو شارە بە تەقەی راستەوخۆی هێزەکانی سەرسنووری ڕژیم بریندار کرا.
بە پێی ئه‌م ڕاپۆرته، رۆژی یەکشەممە ٢٥ی گه‌ڵارێزان، هێزەکانی سەرسنووری ڕژیم لە بەرزاییەکانی سنووری “سەرتەزێن”ی شاری بانە، دەستەیەک لە کۆڵبەرانیان دایە بەر دەستڕێژیی گوللە و بەو هۆیەوە کۆڵبەرێک بە ناوی “نەجمە مورادی” خەڵکی گوندی “قولی ئاوا” به سەختی بریندار بوو. شایانی باسە، ناوبراو بۆ چارەسەریی پزیشکی گوازراوەتەوە بۆ ناوەندە دەرمانییەکانی شاری بانه. هه‌روه‌ها، ئێوارەی ڕۆژی دووشەممە ٢٦ی گه‌ڵارێزان، بە هۆی تەقینەوەی مینێکی بەجێماو لە شەڕی هەشت ساڵەی نێوان ئێران و عێراق لە کوێستانی گوندی “پاراستان” کە لە سنووری شاری سەردەشت هەڵکەوتووە، شوانێک بە به ناوی “ئەحمەد مەمەندی” و خەڵکی گوندی “دەشتە” به سەختی بریندار بوو.