ئێعدامی سێ به‌ندكراو له‌ زیندانی دیزڵ ئاوای كرماشان

له‌ ماوه‌ی دوو هه‌فته‌ی ڕابردوودا، حوکمی ئێعدامی سێ هاووڵاتیی لە زیندانی دێزڵاوای کرماشان بەڕێوە چوو.

به‌ پێی ئه‌م ڕاپۆرته‌، شوناسی دوو کەس له‌و به‌ندكراوانه‌ “شەهاب نادری”، تەمەن ٢٢ ساڵ و “بورزو محەممەدی” تەمەن ٣٨ ساڵ ڕاگەیندراوه‌ و هەروەها سەرەڕای تێپەڕینی دوو حەوتوو بەسەر ئێعدامکرانی ئەو سێ هاووڵاتییە، میدیاکانی نێوخۆی ئێران و بەرپرسانی ڕژیم لە به‌رامبه‌ر لەسێدارەدانی ئەو سێ زیندانییە بێدەنگییان هەڵبژاردووە. شایانی باسه‌، ئەو دوو به‌ندكراوه‌ بە تۆمەتی “کوشتنی بەئەنقەست” بە “قیساس” مەحکووم کرابوون. جێگه‌ی ئاماژه‌یه‌، شوناس و تاوانی سێیەمین زیندانی کە لەو ڕۆژەدا و لە زیندانی دێزڵاوای کرماشان ئێعدام کرابوو، هەتا ئێستا ناڕوونە.