ڕۆژی هەینی ٢٤ی ڕێبەندان، دوو چالاکی مەدەنی دانیشتووی شاری تاران، پاش زیاتر لە یەک مانگ دەستبەسەرکرانیان، بە دانانی بارمتەی قورس بە شێوەیەکی کاتی ئازاد کران.
بەپێی ڕاپۆرتی گەیشتوو، ئەو دوو چالاکوانە بە ناوەکانی “جەواد ئیمام و ئیبراهیم ئەسغەرزادە” ڕێکەوتی ١٨ و ١٩ی بهفرانباری ئەمساڵ، لە لایەن هێزە سەرکوتگەرەکانی ڕژیمەوە دەستبەسەر و ڕەوانەی شوێنێكی نادیار کران. جێگای ئاماژەیە کە ئەو دوو شارومەندە تا کاتی ئازاد بوونیان، لە مافی دەستڕاگەیشتن بە پارێزەر و پەیوەندی لەگەڵ بنەماڵەکانیان بێبەش کرابوون و هەروەها لە ساڵانی ڕابردوودا، چەندین جار لە لایەن ڕژیمی کۆماری ئیسلامییەوە بانگهێشت، لێپرسینەوە و تەنانەت حوکمی قورسی قەزاییان بەسەردا سەپێندراوە.