ڕاپۆرته‌كان باس له‌وه ده‌كه‌ن كه دوو هاووڵاتیی خه‌ڵكی گوندی “ئیندرقاش”ی مه‌هاباد و پیرانشار ڕۆژی سێشه‌ممه و چوارشه‌ممه به دانانی وه‌سیقه و به شێوه‌ی كاتی له زیندان ئازاد كراون.
به پێی ئه‌م ڕاپۆرته، ڕۆژی چواڕشەممە ٢١ی گه‌ڵارێزان، هاووڵاتییەکی خەڵکی گوندی “ئیندرقاشـ”ـی شاری مەهاباد بە ناوی “ئومید عەباسی”، پاش ١٣٣ ڕۆژ به‌ندكران بە دانانی وه‌سیقه و بە شێوەی کاتی لە زیندانی ئەوشارە ئازاد کرا. جێگه‌ی ئاماژه‌یه، ناوبراو ڕۆژی چوارشەممە ١١ی پووشپەڕ، به تۆمه‌تی “هاوكاری له‌گه‌ڵ یه‌كێك له حیزبه نه‌یاره‌كانی ڕژیم” لە لایەن هێزە ئەمنییەکانەوە دەستبەسەر کرابوو. هه‌روه‌ها ڕۆژی سێشەممە ٢٠ی گه‌ڵارێزان، “سەید ئەمیر تاهیریان” خەڵکی مەهاباد و دانیشتووی شاری پیرانشار، دوای تێپەڕکردنی ٤٦ مانگ لە ماوەی ٦٦ مانگ حوکمی زیندانه‌كه‌ی، بە مەرج ئازاد كرا. جێگه‌ی وه‌بیرهێنانه‌وه‌یه، ناوبراو مانگی رەشەممە ساڵی ١٣٩٥، لە لایەن هێزەکانی ئیدارەی ئیتلاعاتی پیرانشار دەستبەسەر و بۆ ئیدارەی ئیتلاعاتی مەهاباد گوازرابوویه‌وه و دواتر لە لایەن دادگای ڕژیم له شاری مەهاباد بە هه‌مان تۆمەت، حوکمی ٥ ساڵ و ٦ مانگ زیندانی بەسەردا سه‌پابوو.