ڕاپۆرته‌كان باس له‌وه ده‌كه‌ن كه سێ هاووڵاتیی خه‌ڵكی شاره‌كانی سه‌وڵاوا و شنۆ به ناوه‌كانی “هیوا عەزیزپوور”، “نەسروڵڵا حەیدەرنژاد” و “فارووق عه‌زیزی”، به دوای دانانی وه‌سیقه له زیندان ئازاد كراون.
به پێی ئه‌م ڕاپۆرته، ڕۆژی سێشەممە ٢٠ی گه‌ڵارێزان دوو هاووڵاتیی خه‌ڵكی گوندی “دێزوەزناو”ی سەر بە شاری سەوڵاوا بە ناوەکانی “هیوا عەزیزپوور” و “نەسروڵڵا حەیدەرنێژاد” دوای دوو مانگ ڕاگیران لە گرتووخانه‌ی ئیتلاعاتی سنە، بە دانانی وه‌سیقه‌ی ١٢٠ و ۸۰ مییۆن تمەنی و بە شێوەی کاتی هەتا ڕۆژی بەڕێوەچوونی دانیشتنی دادگا، له زیندان ئازاد کران. شایانی باسه، ئەو دوو هاووڵاتییە لە ماوەی ئەو دوو مانگەدا، نەیانتوانیوە چاویان بە بنەماڵەکەیان بکەوێت و لە هەبوونی مافی دەستپێڕاگەیەشتن بە پارێزەریش بێبەش کرابوون. جێگه‌ی ئاماژه‌یه، “هیوا عەزیزپوور” ڕۆژی پێنجشەممە ٢٠ی خەرمانان و “نەسروڵڵا حەیدەرنێژاد” ڕۆژی یەکشەممە ٢٣ی خەرمانان لە لایەن هێزەکانی ئیدارەی ئیتلاعاتی سەوڵاوا بە تۆمەتی “هاوکاری لەگەڵ یەکێک لە حیزبە نه‌یاره‌كانی ڕژیم” دەستبەسەر کرابوون. هه‌روه‌ها به پێی ڕاپۆرتی ناوه‌ندی دێمۆكراسی و مافی مرۆڤی كوردستان، هاووڵاتییه‌كی خه‌ڵكی گوندی “بێمزه‌ڕه‌ت”ی شاری شنۆ به ناوی “فارووق عه‌زیزی” كه ڕۆژی دووشه‌ممه ٥ی گه‌ڵارێزان له لایه‌ن هێزه‌كانی ئیداره‌ی ئیتلاعاتی ئه‌مشاره‌وه ده‌ستبه‌سه‌ر كرابوو، پاش ته‌واوبوونی قۆناغه‌كانی لێپرسینه‌وه و به شێوه‌ی كاتی له زیندان ئازاد كراوه.