به پێی ڕاپۆرتی ناوه‌ندی دێمۆكراسی و مافی مرۆڤی كوردستان، دوو هاووڵاتیی خه‌ڵكی شاری شنۆ به ناوه‌كانی “عه‌لی ئیسماعیلی” و “هێمن ڕاغ” به‌دوای ته‌واوبوونی قۆناغه‌كانی لێپرسینه‌وه له زیندانی ناوه‌ندی ئه‌مشاره ئازاد كران.
به پێی ئه‌م ڕاپۆرته، “عه‌لی ئیسماعیلی” ڕۆژی دووشه‌ممه ٨ی مانگی گوڵانی ئه‌مساڵ له لایه‌ن هێزه ئه‌منییه‌كانه‌وه ده‌ستبه‌سه‌ر و به‌مه‌به‌ستی ته‌حه‌مۆلی حوكمی یه‌كساڵ زیندانه‌كه‌ی ڕاپێچی زیندانی ناوه‌ندی شنۆ كرابوو. شایانی باسه، ناوبراو پێشتریش له مانگی به‌فرانباری ساڵی ٩٧ به تۆمه‌تی “هاوكاری له‌گه‌ڵ یه‌كێك له حیزبه نه‌یاره‌كانی ڕژیم” ده‌ستبه‌سه‌ر و پاش دوو مانگ ڕاگیران له زیندان ئازاد كرابوو. له لایه‌كی دیكه‌وه، هاووڵاتییه‌كی دیكه‌ی خه‌ڵكی ئه‌مشاره به ناوی “هێمن ڕاغ” كه سه‌ره‌تای ساڵی ٩٨ به هه‌مان تۆمه‌ت ده‌ستبه‌سه‌ر و به ١٨ مانگ زیندان مه‌حكووم كرابوو، به‌دوای ته‌واوبوونی قۆناغه‌كانی لێپرسینه‌وه له زیندان ئازاد كراوه.