ڕۆژی چوارشه‌ممه ٨ی مانگی خه‌رمانان، “نه‌وزاد چاپكین” نووسه‌ر و چالاكی سیاسی خه‌ڵكی دیاربه‌كر پاش ٢٩ ساڵ زیندان به‌هۆی شێرپه‌نجه‌وه گیانی له‌ده‌ستدا.
به‌پێی ڕاپۆرته‌كان، “چاپكین” ٨ مانگ له‌وه‌پێش و پاش ٢٩ ساڵ به‌ندكران، به‌هۆی نه‌خۆشی له زیندانی “بشیك دۆزۆی” له شاری “ترابۆزان“ی توركیا ئازاد كرابوو و كۆتاییه‌كانی ژیانی له نه‌خۆشخانه‌یه‌كی شاری “دیاربه‌كر” تێپه‌ڕ كرد. ناوبراو پاش گیان له ده‌ستدان به‌به‌شداری هه‌زاران كه‌س له خه‌ڵكی دیاربه‌كر و چالاكانی مه‌ده‌نی و سیاسی له گۆڕستانی “حاجی ڕه‌ش” به‌خاك سپێردرا. جێگای ئاماژه‌یه كه ناوبراو له‌زینداندا چه‌ندین كتێبی نووسیوه له‌وانه، “شێوه‌نێك بۆ گوڵ“، “ڕاستیه‌كانی كۆمه‌ڵگا“، “ژیانه‌وه‌ی مۆدێرنیته“، “یاسا و كۆمه‌ڵگای ئیلخانه‌كان” و چه‌ندین كتێبی ئه‌ده‌بی كوردی.