کۆمەڵە_رێكخراوی كوردستانی حیزبی كۆمونیستی ئیران
راگه‌یاندنه‌كان

ڕاگه‌یاندنی كۆمیته‌ی ناوه‌ندی كۆمه‌ڵه‌ سه‌باره‌ت به‌ ئێعدامی ڕامین حسێن په‌ناهی، زانیار و لوقمان مۆرادی

2018-09-08| ۱۳۹۷-۰۶-۱۷

كۆمه‌ڵانی خه‌ڵكی كوردستان، خه‌ڵكی تێكۆشه‌ر و خه‌باتكاری ئێران، به‌ره‌به‌یانی ئه‌مڕۆ شه‌ممه‌ ١٧ی مانگی خه‌رمانان، ڕژیمی جه‌نایه‌تكاری كۆماری ئیسلامی ٣ زیندانی سیاسی، ڕامین حسێن په‌ناهی، زانیار و لوقمان مۆرادی له‌ سێداره‌ دا.

ڕامین حسێن په‌ناهی له‌ ژێر توندترین ئه‌شكه‌نجه‌ و ئازاری كۆماری ئیسلامی سه‌ربه‌رزانه‌ خۆڕاگری كرد و ته‌سلیمی فشاری ناڕه‌وای بازجۆكانی نه‌بوو. له‌ ماوه‌ی یه‌ك ساڵی ڕابردوودا ده‌نگی ناڕه‌زایه‌تیی به‌رانبه‌ر به‌ ده‌رچوونی حوكمی ئێعدامی ڕامین له‌ سه‌رتاسه‌ری جیهان به‌رز ببوه‌وه‌. به‌ ده‌یان ناوه‌ندی مه‌ده‌نی و داكۆكیكاری مافی مرۆڤی نێونه‌ته‌وه‌یی، داوای هه‌ڵوه‌شاندنه‌وه‌ی سزای ئێعدامی ڕامین یان كرد. به‌ سه‌دان كۆبوونه‌وه‌ و خۆپیشاندان بۆ پێشگرتن به‌ ئێعدامی ڕامین له‌ هه‌موو جیهان و له‌ هه‌موو به‌شه‌كانی كوردستان به‌ڕێوه‌چوو. له‌ ناوه‌وه‌ی وڵات سه‌ره‌ڕای دیكتاتۆری ده‌سه‌ڵاتی ڕژیمی نگریسی كۆماری ئیسلامی به‌ ده‌یان كۆڕ و كۆمه‌ڵ و خه‌ڵكی ئازادیخواز به‌ ناوی خۆیانه‌وه‌ پشتیوانیان له‌ ڕامین كرد و خوازیاری هه‌ڵوه‌شاندنه‌وه‌ی حوكمی ئێعدامی ئه‌و بوون. به‌ڵام كۆماری ئیسلامی سێداره‌، كه‌ له‌ ناوه‌وه‌ی وڵات كه‌وتۆته‌ ژێر زه‌ختی خه‌باتی حه‌قخوازانه‌ی جه‌ماوه‌ری و ڕێگایه‌ك بۆ ده‌رباز بوون شك نابات، لای وابوو كه‌ ئێعدامی ڕامین ده‌توانێ وره‌ی خه‌باتكارانه‌ی جه‌ماوه‌ری خه‌ڵك له‌ كوردستان و له‌ ئێران دابه‌زێنێ و پێش به‌ گه‌شه‌ و به‌ره‌وپێش چوونی ڕه‌وتی خه‌باتی جه‌ماوه‌ری بگرێ.

هاوكات له‌گه‌ڵ ڕامین، دوو تێكۆشه‌ری سیاسی دیكه‌ی كوردستان، زانیار و لوقمان مۆرادی كه‌ ماوه‌ی ١٠ ساڵ بوو به‌ تۆمه‌تێكی ناڕه‌وا كه‌وتبوونه‌ زیندان، ئێعدام كران. باوكی زانیار، ئێقباڵ مۆرادی به‌ تایبه‌تی دوای گیرانی زانیاری كوڕی، هه‌موو تواناییه‌كانی خۆی بۆ هه‌ڵوه‌شاندنه‌وه‌ی حوكمی ئێعدامی زانیار و لوقمان و به‌ گشتی نه‌مانی سزای ئێعدام ته‌رخان كردبوو. ئه‌ویش دوو مانگ له‌مه‌وپێش له‌لایه‌ن تێرۆریستانی كۆماری ئیسلامی تیرۆر كرا. بۆ زانیار و لوقمانیش هه‌ر به‌م جۆره‌ شه‌پۆلی ناڕه‌زایه‌تیی ده‌ربڕین به‌رانبه‌ر به‌ حوكمی ئێعدام كه‌وته‌ ڕێ. كۆماری ئیسلامی كه‌ گوێی خۆی له‌ هه‌موو ئه‌م داخوازی و ناڕه‌زایه‌تیی ده‌ربڕینانه‌ خه‌واندووه‌، لای وایه‌ كه‌ به‌ ئێعدامی زیندانیانی سیاسی له‌ كوردستان ده‌توانێ جه‌ماوه‌ری خه‌ڵك چاوترسێن بكات. به‌ڵام ئه‌زمونی واقعی نیشانی ده‌دات كه‌ ئه‌و ڕژیمه‌ به‌ ته‌واوی به‌ هه‌ڵه‌ چووه‌ و جه‌ماوه‌ری خه‌ڵكی ئێران و كوردستان له‌ بارودۆخێكدا نین كه‌ به‌م جۆره‌ حه‌ره‌كه‌تانه‌ چاوترسێن بن و له‌ خه‌بات بۆ به‌ده‌ست هێنانی داخوازیه‌ ڕه‌واكانیان سارد بنه‌وه‌.

كۆمیته‌ی ناوه‌ندی كۆمه‌ڵه‌ وێڕای ده‌ربڕینی ئه‌و په‌ڕی په‌ژاره‌ و خه‌می خۆی بۆ گیان به‌ختكردنی ئه‌م تێكۆشه‌رانه‌، سه‌ره‌خۆشی له‌ بنه‌ماڵه‌ و كه‌س و كاریان و هه‌موو ئه‌و كه‌سانه‌ی له‌ ماوه‌ی ڕابردوودا ماندووی نه‌ناسانه‌ بۆ نه‌جاتی گیانی ئه‌و ئازیزانه‌ هه‌وڵیان دا، و له‌ هه‌موو خه‌ڵكی كوردستان ده‌كات. ئێمه‌ دڵنیاین كه‌ كۆمه‌ڵانی خه‌ڵكی كوردستان، به‌ حه‌ركه‌تی جه‌ماوه‌ری خۆیان وڵامی لێبڕاوانه‌ به‌و جنایه‌ته‌ ده‌ده‌نه‌وه‌ و خوێنی ئه‌و ئازیزانه‌ ده‌بێته‌ هه‌وێنی شكڵ گرتنی كاردانه‌وه‌یه‌كی گه‌وره‌ و به‌هێزی جه‌ماوه‌ری وه‌ها كه‌ له‌ مێژووی كۆمه‌ڵانی خه‌ڵكی كوردستاندا، ده‌مێنێته‌وه‌.

كۆمیته‌ی ناوه‌ندی كۆمه‌ڵه‌ ( ڕێكخراوی كوردستانی حیزبی كۆمۆنیستی ئێران”

١٧ی خه‌رمانانی ١٣٩٧ هه‌تاوی

بابەتی پەیوەندیدار

ڕاگەیاندنی نوێنەرایەتی_کۆمەڵه_له_دەرەوەی_وڵات:

komalah

ڕاگه‌یاندنی حیزبی كۆمۆنیستی ئێران سه‌باره‌ت به‌ په‌یوه‌ست بوونی بزووتنه‌وه‌ی دژ به‌ گرانی و بزووتنه‌وه كۆمه‌ڵایه‌تییه‌كان

komalah

وڵام بە نامەی کراوەی ڕەوتی جیابووە لە حیزبی کۆمۆنیستی ئێران!

komalah

نامەیکراوە بۆ: هاوڕێیانی ڕەوتی سوسیالیستی کۆمەڵە!

komalah

ڕاگه‌یاندنی ده‌بیرخانه‌ی كومیته‌ی ناوه‌ندی كۆمه‌ڵه‌ سه‌باره‌ت به‌ ده‌ستبه‌سه‌ركراوه‌كانی شاری بانه‌

komalah

ڕاگەیاندنی هاوبەشی ” کۆمیتەی ڕێبەری کاتیی حیزبی کۆمۆنیستی ئێران، کۆمیتەی ناوەندی کۆمەڵە و کۆمیتەی دەرەوەی وڵاتی حیزبی کۆمۆنیستی ئێران”

komalah