بەپێی هەواڵی گەیشتووە، ڕۆژی هەینی ٢٨ی مانگی ڕەزبەر، کۆمەڵێک لە هەڵسووڕاوان و جەماوەری ئازادیخوازی سەقز بە مەبەستی مەحکوومکردنی شەڕی نێوان حەماس و ئیسرائیل و هەروەها کۆمەڵکوژكردنی خەڵکی بێ دیفاعی فەلەستین کۆبوونەوەیەکیان بەڕێوە برد.
بەشداربووانی ئەو کۆبوونەوەیە وێڕای مەحکوومکردنی هێرشەکانی حەماس و ئیسرائیل بۆسەر خەڵکی بێ دیفاعی فەلەستین و ئیسرائیل، خوازیاری کۆتایی هێنان بەو شەڕ و كاولكارییه بوون و جەختیان لەسەر ئەوە کردەوە کە ئەو شەڕە سیاسەتی شەرخوازانەی نێوان گرووپی کۆنەپەرستی حەماس و دەوڵەتی ڕەگەزپەرستی ئیسرائیل و ئه‌و دەوڵەتانه‌یه كه پشتیوانیان لێ ده‌كه‌ن و هیچ پێوەندییەکی بە بەرژەوەندی کۆمەڵانی خەڵکی زەحمەتکێشی فەلەستین و ئیسرائیلەوە نییە. شایانی باسە کە بەشداربووانی کۆبوونەوەکە کۆمەڵێک دروشم و پلاکاردیان لە دژایەتی و مەحکوومکردنی ئەو شەڕە بڵاە کردەوە.