کۆمەڵە_رێكخراوی كوردستانی حیزبی كۆمونیستی ئیران
وتاری ڕۆژ

پیرۆزە بێت ٣١ی جۆزەردان ڕۆژی پێشمەرگەی کۆمەڵە

ئەمڕۆ ٣١ی جۆزەردان ڕۆژی پێشمەرگەی کۆمەڵەیە. هاتنی ئەم ڕۆژە بە سەرجەم پێشمەرگەکانی کۆمەڵە و هەموو ئەو تێکۆشەرانەی کە لە ماوەی ٤٣ ساڵی ڕابردوودا لەناو ڕیزەکانی ئەم هێزەدا خەباتیان کردووە و بە خەت و ڕێبازی ئەم هێزە شانازی دەکەن، لە هەر جێگایەک کەهەن پیرۆزبایی دەڵێین. هەربەم بۆنەیەوە یادی گیانبەختکردوانی ناو ڕیزەکانی هێزی پێشمەرگەی کۆمەڵە بەرز ڕادەگرین و دروود دەنێرین بۆ بنەماڵە سەربەرزەکانیان.

هەوڵ و خەباتی ماندوویی نەناسانەی هێزی پێشمەرگەی کۆمەڵە لە چەند دەیەی ڕابردوودا، هیوای بە ڕزگاریی لە دڵی زەحمەتکێشان و جەماوەری ستەمدیتووی کوردستاندا زیندوو ڕاگرتووە. هێزی پێشمەرگەی کۆمەڵە بەردەوام موژدەبەخشی ژیانێکی باشتر و دنیایەکی بەدوور لە ستەم و چەوسانەوە بوووە.

هێزی پێشمەرگەی کۆمەڵە بە شانازییەوە دەتوانێت نیشانی بدات کە بەدرێژایی تەمەنی خەباتکارانەی خۆی، لەپەنای خەباتی شێلگیرانە و پڕ لە فیداکاری خۆی لەدژی ڕژیمی کۆنەپەرستی ئیسلامی، لە کۆمەڵگای کوردستاندا هێزێکی وشیاریدەر، پشتیوانی ئازادی سیاسی و مافە سەرەتاییەکانی خەڵکی زەحمەتکێش، لایەنگر و داکۆکیکاری مافی ژنان بووە و  بەردەوام تۆوی ئەندێشە و بیر و باوەڕی پێشڕەوی لەناو خەڵکدا چاندووە و موژدەبەخشی دنیایەکی باشتر بۆ کۆمەڵانی خەڵکی کوردستان بوو. هێزی پێشمەرگەی کۆمەڵە، لەهەر شوێنێک بووە، کۆمەڵێک بیرەوەری و دەرس و ئەزموونی بەنرخی لەخۆی بەجێهێشتووە. ئەو بیرەوەرییانە زامن و پاڵپشتی بەرەوپێشچوونەکانی سبەی ڕۆژی ئەم هێزەیە.  جەماوەری خەڵکی کوردستان بە پشتیوانی خۆیان لەم هێزە و بە بەشداری لە چالاکییەکانیدا، لەڕاستیدا دیفاعیان لە حورمەتی ئینسانی خۆیان کردووە. بەهەزاران ئینسان بەشێک لە باشترین ساڵەکانی تەمەنی خۆیان لەناو ڕیزەکانی ئەم هێزەدا تێپەڕکردووە و بەدرووست بەڕابردووی خۆیان شانازی دەکەن. ژومارەیەکی زۆر لە ئینسانە کۆمۆنیستەکان و سیما ناسراو و خۆش نێوەکانی خەڵکی کوردستان کە هیوای ڕزگاریی مرۆڤ لە دەست چەوسانەوە و کاری کرێگرتەیان لەدڵدابوو، لەناو ڕیزەکانی ئەم هێزەدا گیانی خۆیان بەختکرد.

٣١ی جۆزەردان لەهەمانکاتدا ساڵڕۆژی گیانبەختکردنی هاوڕێ ” سەعید موعینی ” ناسراو بە “کاک خانە” یەکەمین گیانبەختکردووی ناو ڕیزەکانی کۆمەڵەیە. بەم بۆنەیەوە ڕێزدەگرین لە یادی ئەو ئازیزەی کە ژیان و خەباتی نموونە و سەرمەشقی پێشمەرگەکانی کۆمەڵە بووە. هاوڕێ سەعید موعینی ساڵی ١٣٥٢ لەلایەن ساواکی شاوە دەستبەسەرکرا و زۆر

بەخێرایی کەوتەبەر ئەشکەنجە و ئازار. ناوبانگی خۆڕاگریی ئەو، دیواری سلولەکانی تێپەڕکرد و ورەی بە هاوبەندییەکانی دەبەخشی. لەو دەورەیەدا هاوڕێ سەعید موعینی وەک خۆڕاگرترین زیندانیی ژێر ئەشکەنجە ناسرا. ساواکی شا سەرەڕای ئەو هەموو ئەشکەنجە و ئازارە وەحشیانەیە، نەیتوانی لێوی ڕازداری ئەو بکاتەوە و پاش ١٨ مانگ ناچار بوو ئازادی بکات. هاوڕێ “سەعید” پاش ئازادبوونی لەزیندان، چالاکیی خەباتکارانەی خۆی لەگەڵ کۆمەڵە دەستپێکردەوە و  ساڵی ١٣٥٦ بۆ مەئموورییەتێکی تەشکیلاتی چوو بۆ کوردستانی عێراق.  بەداخەوە هاوڕێ سەعید بەرلەوەی بتوانێت مەئموورییەتەکەی خۆی بە سەرەنجام بگەیەنێت، ڕۆژی ٣١ی جۆزەردانی ١٣٥٧ لە شەڕ و تێکهەڵچوون لەگەڵ هێزەکانی بەعسی عێراق لە ئاوایی ” دڕێ” لە نزیک شاری ماوەت گیانی بەختکرد.

پێشمەرگەکانی کۆمەڵە لە ژیان و خەباتی هاوڕێ سەعید موعینی ئەو وانە پڕبایەخە فێربوون کە هیچکات توانایی چەکی خۆیان بەپێچەوانەی بەرژەوەندی جەماوەری خەڵکی زەحمەتکێش بەکارنەهێنن و  بەردەوام سياسەتی بەرگری لە بەرژەوەندی کرێکاران و زەحمەتکێشان بەسەر چەکەکانیاندا حاکم بێت. ئەوان فێربوون کە بەردەوام لەپێناو بارهێنانی خۆیان و کرێکاران و زەحمەتکێشاندا تێبکۆشن و هەوڵبدەن کە ببن بە کادرێکی سیاسیی وشیار و هەڵسووڕاوی چینی کرێکار. ئەمانە ئەو خاڵە بەرجەستانە بوون کە لە یەکەمین نامەکانی هاوڕێ سەعید موعینیدا کە لە کوردستانی عێراقەوە بۆ هاوڕێ و هاوسەنگەرانی لە کوردستانی ئێران دەینووسی، دەنگیاندابۆوە.

ڕۆژی پێشمەرگەی کۆمەڵە ئەوەمان وەبیر دەهێنێتەوە کە لە ژیان و خەباتی هاوڕێ سەعید و گیانبەختکردوانی تری کۆمەڵە وانەی سەداقەت، وەفاداریی و پێوەندی پتەو و سەمیمانە لەگەڵ خەڵکی کرێکار و زەحمەتکێش فێر ببین و ئەو پێوەندییە ڕۆژ بەڕۆژ پتەوتر بکەین. هاوڕێ سەعید لەسەر بنەمای ئاوا پاڵپشتییەک بوو کە توانی ١٨ مانگ ئەشکەنجە و ئازاری وەحشیانە و بەردەوامی جەللادەکانی ساواکی شا تەحەمول بکات و لێوی ڕازداری نەکاتەوە و وەک کێوێکی خۆڕاگر لە مەیدانی خەبات لەدژی ستەمکاران و چەوسێنەراندا ڕابوەستێت.

بەرز و پیرۆز بێت ٣١ی جۆزەردان ڕۆژی پێشمەرگەی کۆمەڵە.

بابەتی پەیوەندیدار

ماتەمی کۆماری ئیسلامی و شادمانی خەڵک لە پەڕاوێزی دەرچوونی تیمی کۆماری ئیسلامی لە کێبەرکێکانی جامی جیهانی

-

   سەرکەوتنی شۆڕش لە گرەوی هەتنە مەیدانی کرێکاران، وەک چینێکی کۆمەڵایەتی دایە

-

    ئیبتیکاری عەمەل لەسەر شەقام و لە سۆشیال مێدیا بەدەست خەڵکەوەیە 

-

خەڵکی ئێران ناگەڕێنەوە بۆ بارودۆخی سێ مانگ لەوەپێش

-

حکومەتی ئیسلامی و یاریی دوو لایەنەی سەرکوتی بە ئاشکرا و خۆفریودان

-

ڕیفۆڕم خوازانی حکومەتی چرخی پێنجەمی ماشێنی حاکمیەتی ئیسلامی

-