هه‌واڵی گه‌یشتوو باس له‌وه ده‌كات كه هێزه‌كانی ئینتزامی ڕۆژی هه‌ینی ١٦ی گه‌ڵارێزان هێرشیان بردووه‌ته سه‌ر گوندی “زه‌ردوویی” سه‌ر به به‌شی باینگانی شاری پاوه له ئۆستانی كرماشان و به نیازبوون كه مه‌ڕ و ماڵاته‌كه‌یان زه‌وت بكه‌ن.
به پێی ئه‌م هه‌واڵه، هێزه‌كانی ڕژیم به‌مه‌به‌ستی ترساندنی خه‌ڵك ده‌ستیان كردووه به ته‌قه‌ی هه‌وایی و بێ ئه‌نجام، به‌ڵام خه‌ڵكی ئه‌م گونده له‌ئاست ئه‌م هه‌وڵه كاردانه‌وه‌یان نیشان داوه و به‌ره‌نگاریان بوونه‌ته‌وه. شایانی باسه، خه‌ڵكی ئه‌م دێهاته پێشیان به ماشینی هێزه‌كانی ڕژیم گرتووه و مه‌ڕ و ماڵاته‌كه‌یان هێناوه‌ته خوارێ. جێگه‌ی ئاماژه‌یه، ڕۆژی چوارشه‌ممه ١٤ی گه‌ڵارێزانیش، هێزه‌كانی ڕژیم به هه‌مان شێوه هێرشیان كردبووه سه‌ر گونده‌كانی “به‌رده‌ڕه‌شه و دوپلۆره”ی سه‌ر به شاری مه‌ریوان و مه‌ڕ و ماڵاتی خه‌ڵكیان له‌گه‌ڵ خۆیان بردبوو.