ڕێكخراوی لێبوردنی نێونه‌ته‌وه‌یی ڕۆژی شه‌ممه ٥ی ڕه‌شه‌مه، له به‌یاننامه‌یه‌كدا وێڕای هۆشداری سه‌باره‌ت به دۆخی ته‌ندرووستی “عه‌باس واحدیان شاهڕوودی” له‌زیندانی مه‌شهه‌د، خوازیاری ئازادی بێ شه‌رت و مه‌رجی ئه‌و به‌ندكراوه بوو.
“عه‌باس واحدیان شاهڕوودی” له‌لایه‌ن ده‌زگای قه‌زایی ڕژیمه‌وه به ٢١ ساڵ زیندان مه‌حكووم كراوه و به‌رپرسانی زیندانی وه‌كیل ئابادی مه‌شهه‌د به‌رده‌وام ئه‌شكه‌نجه‌ی جه‌سته‌یی و ده‌روونی ده‌ده‌ن. ئه‌و به‌ندكراوه تووشی چه‌ند نه‌خۆشی بووه، به‌ڵام له ده‌ستڕاگه‌یشتن به ده‌رمان بێبه‌ش كراوه، دۆخی ته‌ندرووستی عه‌باس ڕۆژ له دوای ڕۆژ ڕوو له خراپتر بوونه و ناتوانێت به‌سه‌ر پێوه ڕاوه‌ستێت. ڕێكخراوی لێبوردنی نێونه‌ته‌وه‌یی ڕۆژی ڕابردوو سه‌باره‌ت به دۆخی ته‌ندرووستی ئه‌و به‌ندكراوه هۆشداری دایه به‌رپرسانی قه‌زایی و ئه‌منیه‌تی كۆماری ئیسلامی و خوازیاری ئازادی و ده‌ستڕاگه‌یشتنی به ده‌رمانی بوو.