ڕۆژی سێشه‌ممه ٦ی مانگی ڕه‌زبه‌ر، خه‌ڵكێكی شاری پاوه به به‌شداری ژن، پیاوان، گەنج و پیر به مه‌به‌ستی ناڕه‌زایه‌تی ده‌ربڕین سه‌باره‌ت به داگیركردنی سه‌یرانگای “بیمیری” ئه‌و شاره، چوونەته سەیرانگه‌كه و گوتوویانە قبووڵ ناکەن ئێره كه مڵكی گشتی هاووڵاتییانه لەلایەن کەسانێکەوە داگیربکرێت و ئەوانیش به مه‌به‌ستی کشتوکاڵ بەکاریبهێنن.
به‌پێی ڕاپۆرته‌كان کەسانێک لە سەردەمی حکومەتی پاشایەتیدا بەهۆی دەستڕۆیشتووییان رووبەرێکی زۆری ناوچەی بیمیریان بەناوی خۆیان تۆمارکردووە و ئێستاش بەهۆی دەستڕۆیشتووییان توانیویانە رەزامەندیی دامودەزگا پەیوەندیدارەکان وەربگرن، بۆئەوەی پێنج هێکتاریان پێبدەن و داگیری بکەن. شایانی باسه شوێنی سەیرانگەکە رەنگە کەمتر لە پێنج هێکتار بێت و ئەگەر ئەوان داگیری بکەن، دیوار بە دەوری هەموو کانیاوەکان و شوێنە خۆشەکانی سەیرانگەکەدا دەکێشن و هیچ شوێنێک بۆ گەشت و سەیرانی خەڵک نامێنێتەوە، بۆیە خەڵکیش چوونه‌ته ئه‌و شوێنه و ناڕه‌زایه‌تی خۆیان به‌رانبه‌ر به‌و كاره ده‌ربڕیوه.