كارمه‌ندانی ڕێكخراوی فریاكگه‌وتنی خێرای سلێمانی له‌ئاست نه‌بوونی به‌نزین ناڕه‌زاین و ده‌ڵێن: لەبەر بێ بەنزینی، ئۆتۆمبێلەکانی سەنتەری فریاکەوتنی خێرای سلێمانی ناتوانن بەفریای بەشێک لە هاونیشتمانیانه‌وه بگەن.
شۆفێرانی ئامبۆڵانسی ئه‌و ڕێكخراوه‌یه، پێشتر 80 لیتر بەنزینیان وەردەگرت، بەڵام ئێستا 25 لیتر بەنزین وەردەگرن، ئەم بڕەش زۆر کەمە و بەش ناکات، چونکە ئەم ئۆتۆمبێلە لە بەیانییەوە ناکوژێتەوە و پێویستە بەردەوام ئاماده‌ی كار بێت. به‌وته‌ی به‌ڕێوه‌به‌رایه‌تی ڕێكخراوی فریاكه‌وتنی سلێمانی، دوو هۆکاری سەرەکی بۆ ئەم گرفتە هەن، یەکەم ئەو بڕە پارەیەی ئەمساڵ بۆ بەنزین تەرخانکراوە، هەمان بڕی ساڵی پێشووە لە کاتێکدا ساڵی پار نرخی بەنزین نیوەی نرخی ئێستا بوو، دووهه‌م، کەڵەکەبوونی قەرزەکانی سەر بەڕێوەبەرایەتیی تەندروستیی سلێمانی وایکردووە بەنزینخانەکان چیدی بەنزین بە قەرز نەدەنە ئۆتۆمبێلەکانی فریاکەوتن.