شه‌ش به‌ندكراوی به‌لووچ كه له ڕه‌وتی ناڕه‌زایه‌تیه‌كانی به‌لووچستان ده‌ستبه‌سه‌ركرابوون له‌لایه‌ن ده‌زگای قه‌زایی ڕژیمه‌و به “موحاره‌به” و “افساد فی الارض” مه‌حكووم كراون و مه‌ترسی له سێداردانیان له داهاتوویه‌كی نزیك دا هه‌یه.
به‌پێی ڕاپۆرته‌كان، ناسنامه‌ی ئه‌و شه‌ش به‌ندكراوه به‌لووچه بریتیه له: “شۆعه‌یب میربه‌لووچ زهی” ته‌مه‌ن ١٨ ساڵ، “نیزامه‌دین حوت” ته‌مه‌ن ٢٠ ساڵ، “كامبیز خه‌روت” ته‌مه‌ن ٢١ ساڵ، “مه‌نسوور ده‌همه‌رده” ته‌مه‌ن ٢٢ ساڵ، “ئیبراهیم ناڕوویی” ته‌مه‌ن ٢٥ ساڵ و “مه‌نسوور خه‌روت” ته‌مه‌ن ٢٧ ساڵ. شایانی باسه كه ڕێكخراوی لێبوردنی نێوده‌وڵه‌تی له به‌یاننامه‌یه‌ك دا داوای له كۆمه‌ڵگای جیهانی كرد گوشاره‌كانیان بۆ سه‌ر ڕژیمی كۆماری ئیسلامی ببه‌نه سه‌ره‌وه بۆ ئه‌وی شه‌پۆلی له‌سێداره‌دانی به‌ندكراوانی سیاسی و ناڕازیان ڕابگرن.