به‌داخ و په‌ژاره‌یه‌كی زۆرەوە ئاگادار بووین كه هاوڕێ “ناسر ئەمین نژاد”، کەسایەتی ناسراوی سیاسی و سیمای خۆشەویستی بزووتنەوەی شۆڕشگێڕانەی کوردستان و یەکێک لە کادر و پێشمەرگە دێرینەکانی کۆمەڵە، ڕۆژی ٤ی گه‌لاوێژی ١٤٠٢، به هۆی نەخۆشییه‌کی چاوەڕوان نەکراو له وڵاتی ئاڵمان ماڵئاوایی له ژیان كرد.
هاوڕێ “ناسر ئەمین نژاد” لە بنەماڵەیەکی سیاسی دا چاوی بە ژیان هه‌ڵێنا، هەر لە سەرەتای لاویه‌تیه‌وه بوو بە هەڵسووڕاوێکی چالاکی ئەم بووارە. هاوكات له‌گه‌ڵ شۆڕشی جەماوەری ساڵی ٥٧ لە ئێران، هاوڕێ ناسر چالاکانە لەو شۆڕشەدا بەشداری کرد. چالاكیه سیاسییه‌كانی هاوڕێ ناسر دوای بەدەسەڵات گەیشتنی ڕژیمی ئیسلامیش بەردەوام بوو. دواتر هاوڕێ ناسر خەباتی سیاسی خۆی بە کۆمەڵەوە گرێ دا و بوو بە کادر و پێشمەرگەیەکی به توانا. هاوڕێ ناسر دوای چەندین ساڵ خەبات و تێکۆشان، لە وڵاتی ئاڵمان نیشتەجێ بوو و لەوێش چالاکی سیاسی خۆی درێژە پێ دا. ئێمە پڕ بەدڵ سەرەخۆشی لە بنەماڵەی ئازیزی هاوڕێ ناسر، بەتایبەت هاوسەری بەڕێزی هاوڕێ فاتمە و منداڵەکانی ئارام، ئارینا و ئاروین، هەروەها هەموو هاوڕێیانی دەکەین و خۆمان بە شەریکی غەمیان دەزانین. یادی ئازیزی به‌رز و به‌رێز بێت.