“موته‌هه‌ره گونه‌یی” و “خه‌شایار سفیدی” دوو خوێندكاری زانكۆی هونه‌ر له ناڕه‌زایه‌تی به سه‌پاندنی سزای ئێعدام به‌سه‌ر “تووماج ساڵحی” و ئازاری ژنان له‌لایه‌ن گه‌شتی ئێرشاده‌وه له‌به‌رده‌م خانه‌ی مووسیقی ئێران مانیان گرتووه.
به‌پێی زانیارییه‌كان، ئه‌و دوو خوێندكاره بۆ ماوه‌ی ٧٢ ساعه‌ت له‌به‌رده‌م خانه‌ی مووسیقی دا مانیان له خواردن گرتووه و داوای هه‌ڵوه‌شاندنه‌وی حوكمی ئێعدامی تووماج و كۆتایی هێنان به سه‌ركوتی ژنانی ئێرانی ده‌كه‌ن. له هه‌واڵێكی دیكه‌دا، خوێندكارانی زانكۆی به‌هه‌شتی له به‌یاننامه‌یه‌كدا پشتیوانی خۆیان له ژنانی ئێرانی و تووماج ساڵحی ڕاگه‌یاند و هۆشداریان دایه ده‌وڵه‌ت كه ئه‌گه‌ر كۆتایی به سه‌ركوتگه‌رییه‌كانی نه‌هێنێت، ئه‌وه به‌هێزتر له هه‌میشه ئه‌گه‌رێنه‌وه سه‌ر شه‌قام.