کۆمەڵە_رێكخراوی كوردستانی حیزبی كۆمونیستی ئیران
بابه‌تی گه‌یشتوو

لە یاریی ژیاندا بەردەوام داشی مەرگی نابەوەخت بەسەر لاوازەکاندا سوارە

2017-03-09 | ۱۳۹۵-۱۲-۱۹

سەعید ئەمانی

 

مەرگی بێوەخت و لەناکاو

هەر بە منی لاواز دەوێرێ

لەبوسەمدا لەگشت شوێنێ

لە بولەرزە و لافاو و توشی و تۆفانا

وەک حەزیایەک

هێرش و هاشاوڵم بۆ دێنێ

لە بۆمبی بیر و ئەفکاری داعشانە و

سوتانی ” پلاسکۆ” کاندا

بڵێسەکانی ئاگرە و دەمبرژێنێ

بە بنار و بە بەرزایی شاخانەوە

لەسەر ڕێگای کۆڵبەریمدا

ڕنوی بەفرە و دێ بەرومدا

لەسەر سنور گوللەی پاسدار و مەئمورە

جەستەی کردومە نیشانە

لەشوێنی کار و کارخانە

گەردیلەی گاز و دوکەڵە

ئاوێتەی هەناسەدانمە

دێوەزمەی بێکاریە و

بەردەوام لەسەر شانمە

پەتی سێدارەی دوژمنە

گەروم دەگوشێ

زەخت و گوشاری زۆردارە

دەمتارێنێ

سەرمای وەرزی نەهامەتیە

دەمتەزێنێ

لە ڕێگای کۆچ کردنمدا بۆ هەندەران

شەپۆلەکانی دەریایە دەمخنکێنێد

سوکایەتی تاراوگەیە دەمتاوێنێ

دەبێتە شەڕ و ئاژاوە

پێم دەفرۆشرێ

دەکرێتە بومب و گوللە

تێمی دەگرن

ئاوێتەی پیلان و خورافەیە

بە لامەوە پیرۆز دەکرێ دەبێتە تیری بێ هیوایی و

بەدەستی خۆم دامدەبێژێ

دەستی بە هێزی زۆردارە و

هەر رۆژەو بە چەشنێ منی بێ هێز

دەسڕێتەوە

داری هیوام بەرناهێنی

لەڕەگەوە دەیبڕێتەوە

*** ئەو دوژمنانەی تا ئێستا

منیان کوشتوە

ئەو دەستانەی لە بێ هێزی من بەهێز بوون

هیواکانمیان ناشتوە

ئەو دەنگانەی بەسەر دەنگمادا دلێر بوون

هەر خۆم بە توانام کردون و

لە بێدەنگی من بوێر بوون

*** من بە ئەژمار

مەزنترین هێزی دنیام

ژیان بەخش و خوڵقێنەری

ئاسودەیی و هەرچی ئەشیام

گەر بمەوێ لەو بەهەشتەی

لەم جیهانە خوڵقاندومە

بەشم هەبێ

ئازار و مەرگ بتارێن و

وەکو مرۆڤ لە خۆشیدا

کەشم هەبێ

دەبێ هێزم کۆبکەمەوە

داسی خەبات و تێکۆشان

بۆ دروێنەی

ئازار و ژان

هەڵبڕینی لاسکی زوڵمی زۆرداران

تیژ و دەمەزەرد کەمەوە

دەبێ بەخۆمدا بێمەوە!

ئەو نەزمە پێچەوانەیە

بۆباری خۆی هەڵگێڕمەوە.

 

بابەتی پەیوەندیدار

چەمک و مەفهومی کمونیزم ئامادە کردنی: پەیمان

-

دۆخی ئازادی ڕۆژنامەگەری لە کوردستان و بەشێک لە وڵاتانی دنیا لە ئامادەکردنی پەیمان

وتارێکی لنین بە بۆنەی یەکی ئایارەوە کە لە ساڵی ١٩٠٤ دا نووسراوە لە فارسیەوە: هیوا مەجید زادە

-

ڕۆژی یەکی ئەیار، بە ڕیوایەتی” رۆزا لۆکزامبۆرگ” سەرچاوە: ئاڕشیوی دەنگی شۆڕشی ئێران

-

ئێران بۆ ھێرش دەکاتە سەر ھەولێر؟

د.شێرکۆ کرمانج

شەرە جنێوی هیتلەرەکان، پەیوەندی بە مافی ستم لێکراوانەوە نییە ؟!

-