كۆمه‌ڵێك له ده‌ستفرۆشانی شاری سنه ڕۆژی شه‌ممه ٢٦ی ڕه‌زبه‌ر، له ناڕه‌زایه‌تیی به هه‌ڵسووكه‌وتی نه‌شیاوی مه‌ئموورانی شاره‌داریی و پێشگرتن به كار و كاسبیان، ده‌ستیاندایه كۆبوونه‌وه.
به پێی ڕاپۆرته‌كان، ناڕازییان كه ژماره‌یان زیاتر له ٣٠٠ كه‌س ده‌بوو به به‌ڕێوه‌بردنی ئه‌م كۆبوونه‌وه‌یه له مه‌یدانی سه‌ره‌كی شار و به وتنه‌وه‌ی درووشمی ئێعتڕازیی، خوازیاری دیاری كردنی شوێنێكی تایبه‌ت بۆ ده‌ستفرۆشان بوون. به‌وته‌ی ناڕازییان، خه‌ڵكێكی زۆر ناچارن بۆ دابین كردنی بژێوی ژیانیان ڕوو بكه‌ن كاری ده‌ستفرۆشی و ماوه‌ی چه‌ندین ساڵه كه له قه‌راغ شه‌قامه‌كانی شار له‌وانه، فێرده‌وسی، دۆخانیات، خومه‌ینی و شه‌قامی ئینقلاب، كه‌لوپه‌له‌كانیان بڵاو ده‌كه‌نه‌وه و سه‌رقاڵی كاری ده‌ستفرۆشین. ده‌شڵێن: به‌دوای ڕێكاری ئه‌م دواییانه‌ی شاره‌داریی كه گرتوویه‌ته به‌ر، چیدی دابین كردنی هه‌زینه‌كانی ژیان بۆیان كارێكی زۆر دژواره و ئه‌مه‌ش ئه‌وانی له‌گه‌ڵ كێشه‌ی جیدی به‌ره‌وڕوو كردووه‌ته‌وه.