به‌پێی هه‌واڵی گه‌یشتوو، ڕۆژی هه‌ینی ٥ی جۆزه‌ردان، دایكانی شۆڕشی “ژینا” له شاره‌كانی دێولان، سنه و دیوانده‌ره سه‌ردانی بنه‌ماڵه‌ی گیانه‌بختكردووانی شاری كامیارانیان كرد و په‌یمانیان له‌گه‌ڵیاندا نوێ كرده‌وه.
به‌پێی ڕاپۆرته‌كان، دایكانی شۆڕشی “ژینا” له شاره‌كانی سنه، دێولان و دێوانده‌ره سه‌ردانی دایكی “فه‌رزاد كه‌مانگه‌ر”یان كرد له شاری كامیاران و ڕێزیان له فیداركارییه‌كانی ئه‌و مامۆستا دڵسۆزه گرت. هه‌روه‌ها دایكانی شۆڕش پێكه‌وه سه‌ردانی ماڵی گیانبه‌ختكردووان “فوئاد قه‌دیمی” و “بورهان كه‌ره‌می”یان كرد و هاوڕێ له‌گه‌ڵ خزم و كه‌س و كاریان له‌سه‌ر گڵكۆی ئه‌و هه‌میشه زیندووانه كۆبوونه‌وه. دایكانی شۆڕشی “ژینا”ی كوردستان وێڕای ڕێزگرتن له یاد و بیره‌وه‌ری ته‌واوی قوربانیانی ڕێگه‌ی ئازادی و به‌رابه‌ری په‌یمانیان له‌گه‌ڵ ئاواته‌كانیان نوێ كرده‌وه و به‌ڵێنیان دا درێژه‌ده‌ری ڕێگای پڕ شانازیان بن.