ڕۆژی دووشه‌ممه ٢١ی جۆزه‌ردان، دایكانی شۆڕشی ژینا له شاره‌كانی بۆكان و سه‌قز كۆبوونه‌وه و ڕێزیان له یادی ئازیزانیان گرت.
به‌پێی زانیارییه‌كان، ڕۆژی ڕابردوو، هاوكات له‌گه‌ڵ ساڵڕۆژی له‌دایكبوونی “دانیال پایبه‌ندی” له گیانبه‌ختكردووانی شۆڕشی ژینان له شاری سه‌قز، ژماره‌یه‌ك له دایكانی دادخواز له شاره‌كانی بۆكان و سه‌قز له ماڵی دانیال كۆبوونه‌وه و یه‌كڕیزی و یه‌كگرتوویی خۆیان دووپات كرده‌وه. به‌وته‌ی سه‌رچاوه‌كانی هه‌واڵ، دایكانی “شه‌هریار محه‌ممه‌دی”، “فه‌ره‌یدوون مه‌حموودی” و “فه‌ره‌یدوون فه‌ره‌جی” له‌گه‌ڵ دایكی “دانیال پایبه‌ندی” دا كۆبوونه‌ته‌وه و ڕێزیان له یادی و بیره‌وه‌ریی ڕۆڵه‌كانیان گرتووه. دایكانی شۆڕشی ژینا بۆ جارێكی دیكه جه‌ختیان له‌سه‌ر یه‌كڕیزی دایكانی دادخواز كرده‌وه و ڕایانگه‌یاند: تا ئه‌و كاته‌ی بكوژی ڕۆڵه‌كانیان محاكمه ده‌كه‌ن درێژه به خه‌باتیان دژبه كۆماری ئیسلامی ئه‌ده‌ن.