ئێواره‌ی ڕۆژی سێشه‌ممه ٢٣ی مانگی خه‌زه‌ڵوه‌ر، چوار كۆڵبه‌ر له‌وانه دوو مێرمنداڵی ته‌مه‌ن ژێر ١٨ ساڵ، به ته‌قه‌ی هێزه‌كانی ڕژیم له سنووری هه‌نگه‌ژاڵی بانه بریندار و كۆڵبه‌رێك به ته‌قه‌ی ڕاسته‌وخۆ گیانی له‌ده‌ستدا.
به‌پێی ڕاپۆرتی گه‌یشتوو به كۆڵبه‌رنیووز، ڕۆژی سێشه‌ممه كۆمه‌ڵێك كۆڵبه‌ر له سنووری هه‌نگه‌ژاڵی بانه، كه‌وتوونه‌ته بۆسه‌ی هێزه‌كانی ڕژیم و كۆڵبه‌رێك به ناوی “یادگار ڕه‌حیمی” خه‌ڵكی بانه، به ته‌قه‌ی ڕاسته‌وخۆ گیانی له‌ده‌ستداوه و چوار كۆڵبه‌ری دیكه‌ش بریندار بوون. ناسناوی ئه‌و چوار كۆڵبه‌ره بریتیه له: “ئاروین محه‌ممه‌دی” ته‌مه‌ن ١٤ ساڵ، “ئیمان(پاشناو نادیار)” ته‌مه‌ن ١٧ ساڵ هه‌ر دوو خه‌ڵكی سنه، “حسێن(پاشناو نادیار)” ته‌مه‌ن ٢٠ ساڵ و “شاهۆ(پاشناو نادیار)” ته‌مه‌ن ٢١ ساڵ خه‌ڵكی بانه. جێگای ئاماژه‌یه كه سه‌رچاوه‌كانی هه‌واڵ باس له برینداركردنی كۆڵبه‌رێكی دیكه‌ش ده‌كه‌ن به‌ڵام تا كاتی داڕشتنی ئه‌و هه‌واڵه هیچ زانیارییه‌ك له‌سه‌ر ناسناوی له‌به‌رده‌ستدا نییه.