به‌پێی هه‌واڵی گه‌یشتوو، ڕۆژی دووشه‌ممه ٣ی مانگی ڕه‌زبه‌ر، شه‌ڕ و پێكدادانی قورس له نێوان دوو بنه‌ماڵه له گوندی “ڕه‌جه‌وی” سه‌ر به شاری سه‌لاسی باوه‌جانی ڕوویدا و به‌هۆیه‌وه دوو كه‌س به ناوه‌كانی “دیار سه‌یدی” ته‌مه‌ن ١٨ ساڵ و “یووسف قه‌زاوه‌ت” ته‌مه‌ن ٦٠ ساڵ گیانیان له‌ده‌ستدا و چه‌ند كه‌سی دیكه‌ش برینداربوون.
به‌وته‌ی سه‌رچاوه خۆجێیه‌كان، هۆكاری ئه‌و شه‌ڕ و ناكۆكییه ئه‌گه‌ڕێته‌وه بۆ ٤٠ ساڵ له‌وه‌پێش و گۆیا دژبه‌رێكی ڕژیم له یه‌كێك له بنه‌ماڵه‌كانی گوندی “ڕه‌جه‌وی” سه‌ر به سه‌لاسی باوه‌جانی له‌لایه‌ن پاسدارێكی ڕژیم به ناوی “عه‌لی قه‌زاوه‌ت” كوژراوه و ته‌رمه‌كه‌ی له نزیك سنوور ناشتووه. ماوه‌یه‌ك له‌وه‌به‌ر كه‌سێك ڕاپۆرتی ئه‌و ڕووداوه‌ی به بنه‌ماڵه‌ی كوژراوه‌كه داوه و كاتێك چوونه‌ته شوێنی ناشتنی ته‌رمه‌كه‌ی، ڕاستی ڕووداوه‌كه بۆیان ده‌ركه‌وتووه و له‌و كاته‌وه له نێوان دوو تایفه ناكۆكی سه‌ری هه‌ڵداوه. شه‌وی دووشه‌ممه هه‌ر دوو بنه‌ماڵه به چه‌كی كڵاشینكۆف، په‌ڕان و چه‌قۆ ده‌رگیر بوون و به‌هۆیه‌وه دوو كه‌س به ناوه‌كانی “دیار سه‌یدی” و “یووسف قه‌زاوه‌ت” كوژران و چه‌ندین كه‌سی دیكه‌ش بریندار بوون. جێگای ئاماژه‌یه كه هێزه‌كانی سپای پاسداران و پۆلیس هیچ هه‌وڵێكیان بۆ هێوركردنه‌ه‌وه‌ی دۆخه‌كه هه‌ڵ نه‌گرتووه و هه‌وڵیان نه‌داوه ڕێگه له ڕووداوه‌كه بگرن.