ڕۆژانی یه‌كشه‌ممه و دووشه‌ممه ٢٢ و ٢٣ی ڕێبه‌ندان، چوار كرێكار له شاری زه‌نجان بریندار بوون و سێ كرێكاری دیكه له شاره‌كانی كرماشان، ڕه‌شت و تاران به‌هۆی نه‌بوونی ئیمه‌نی شوێنی كار گیانیان له‌ده‌ستدا.
به‌پێی ڕاپۆرته‌كان، ڕۆژی یه‌كشه‌ممه به‌هۆی نه‌بوونی ئیمه‌نی شوێنی كار، چوار كرێكار له كارگه‌یه‌كی سه‌نعه‌تی له شاری زه‌نجان به‌هۆی ئاگركه‌وتنه‌وه بریندار و ڕه‌وانه‌ی نه‌خۆشخانه كران. ڕۆژی دووشه‌ممه كرێكارێكی شاغڵ له شاره‌داری تاران له‌كاتی خاوێنكردنه‌وه‌ی پردی سه‌ر ئۆتووبانی نیایش، له به‌رزایی به‌ربۆته خواره‌وه و گیانی له‌ده‌ست داوه. هه‌مان ڕۆژ له شاری ڕه‌شت كرێكارێكی بیناسازی به‌هۆی كه‌وتنه نێو چاڵی ئاسانسۆڕ كوژراوه و له شاری كرماشان كرێكارێكی بیناسازی به‌هۆی به‌ربوونه‌وه له نهۆمی چواره‌می خانوویه‌ك ده‌ستبه‌جێ گیانی له‌ده‌ست داوه.