ڕۆژی شه‌ممه ٢٧ی گه‌لاوێژ، كه‌مپه‌ینی یه‌كگرتووی ژنانی باشووری كوردستان كه‌مپه‌ینێكی بۆ ئیدانه‌كردنی سزای ئێعدام له ئێران ڕێكخست و كۆمه‌ڵێك له چالاكوانان تێدا به‌شدار بوون.
كه‌مپه‌ینی ژنانی یه‌كگرتووی باشووری كوردستان له كۆبوونه‌وه‌ی ئه‌و كه‌مپه‌ینه دا به‌یاننامه‌یه‌كی بڵاو كرده‌وه و تێدا ئاماژه‌ی به سیاسه‌تی گوشار و سه‌ركوتی كۆماری ئیسلامی بۆ سه‌ر ژنان كرد و ڕایگه‌یاند: حكوومه‌تی پیاوسالار و كۆنه‌په‌ره‌ستی ئێران له هێز و ئیراده‌ی ژنان ده‌ترسێت، به‌و بۆنه‌وه هه‌وڵ ئه‌دات له ڕێگه‌ی ڕفاندن، به‌ندكران و ئێعدام پێشڕه‌وانی بزووتنه‌وه‌ی ژن،ژیان،ئازادی سه‌ركوت و كۆمه‌ڵگا بێده‌نگ بكات. كه‌مپه‌ینی ژنانی یه‌كگرتووی باشووری كوردستان پاڵپشتی خه‌بات و تێكۆشانی ژنانی ئێرانی، هه‌روه‌ها كه‌مپه‌ینی نا بۆ ئێعدامه و داوا له حكوومه‌تی ئێران ده‌كات تاكوو كۆتایی به دوژمنایه‌تیكردنی له‌گه‌ڵ ژنان بێنێت.