چوار به‌ندكراوی شۆڕشی “ژن،ژیان،ئازادی” له شاری سنه به ناوه‌كانی “كه‌یوان زه‌ندكه‌ریمی”، “سه‌ردار شاهمورادی”، “ئارام ئازاد” و “هووشه‌نگ چوارگورگه” له‌لایه‌ن ده‌زگای قه‌زایی ڕژیمه‌وه به “موحاره‌به” تۆمه‌تبار كراون و ئێستا گیانیان له مه‌ترسی جیددی دایه.
له ئێستادا په‌روه‌نده‌ی “سه‌ردار شاهمورادی” خوێندكاری بواری دكتۆرای پزیشكی، “كه‌یوان زه‌ندكه‌ریمی” دووكاندار، “هووشه‌نگ چوارگورگه” و “ئارام ئازاد” به تۆمه‌تی “موحاره‌به” له لقی ١ی دادگای ئینقلابی سنه به سه‌رۆكایه‌تی قازی “سه‌عیدی” له ژێر به‌داواداچوون دایه. ئه‌و چوار به‌ندكراوه له ماوه‌ی ٨ مانگی ڕابردوودا چه‌ندین جار له گرتووخانه‌ی ئیتلاعاتی شارامفه‌ری سنه ئه‌شكه‌نجه و ئازار و ناچار به ئێعترافی ئیجباری كراون. شایانی باسه كه ئه‌و چوار هاووڵاتیه مانگی سه‌رماوه‌زی ساڵی ڕابردوو له‌لایه‌ن هێزه ئه‌منیه‌تیه‌كانه‌وه ده‌ستبه‌سه‌ر كرابوون.