“نایب عەسکەری” زیندانیی سیاسیی خەڵکی ورمێ جارێکی دیکە لەلایەن لقی ٢ی دادگای ئینقلابی ئەو شارەوە بە تۆمەتی “هاوكاری له‌گه‌ڵ یه‌كێك له حیزبه نه‌یاره‌كانی ڕژیم” به موحاره‌به و ئێعدام مه‌حكووم كراوه.
به‌پێی زانیارییه‌كان، “نایب عەسکەری” ٤ی خاکەلێوەی ١٤٠٠ لەلایەن هێزەکانی ئیتلاعاتی سپای پاسدارانی ورمێوە دەستبەسەر و پاش سێ مانگ ڕاگیران لە گرتووخانه‌ی ئەو ناوەندە ئەمنیەتیه بۆ زیندانی ناوەندیی ورمێ ڕاگوێزرابوو. ناوبراو پێشتر لە هەرێمی کوردستان نیشتەجێ بووە و ساڵی ٩٧ی هه‌تاوی لەلایەن دادگای ئینقلابی ورمێوە بە تۆمەتی “ئه‌ندامه‌تی له یه‌ێكێك له حیزبه نه‌یاره‌كانی ڕژیم” به موحاره‌به و ئێعدام مه‌حكووم كرابوو به‌ڵام پاش ده‌ر‌بڕینی ناڕه‌زایه‌تی حوكمه‌كه‌ی له دادگای پێداچوونه‌وه هه‌ڵپه‌سێردرا و په‌روه‌نده‌كه‌ی ڕاگوێزی لقی ٢ی دادگای ئینقلابی ورمێ كرا. ئەو زیندانییە سیاسییە نەخۆشیی بەردی گورچیلەی هەیە و سەرەڕای ڕاسپاردەی پزیشکان بۆ چارەسەری پزیشکی لە دەرەوەی زیندان تاکوو ئێستا بە هۆی دژایەتیی بەرپرسانی زیندان لە دەسپێڕاگەیشتن بە خزمەتگوزاریی دەرمانی بێبەری کراوە.