ڕاپۆرته‌كان له شاره‌كانی كوردستان باس له‌وه ده‌كه‌ن كه هێزه‌كانی ڕژیم له‌درێژه‌ی ڕه‌وتی ده‌ستبه‌سه‌ر كردنی هاووڵاتییان، لانیكه‌م حه‌وت كه‌سیان له شاره‌كانی پیرانشار و پاوه به بێ هیچ هۆكارێك ده‌ستبه‌سه‌ر و ڕاپێچی شوێنێكی نادیار كردووه.
ڕۆژی یەکشەممە ٢٥ی گه‌ڵارێزان، چوار هاووڵاتیی خەڵکی گوندی “گەرگوولی خوارێ” سەر به شاری پیرانشار بە ناوەکانی “نەجمەدین سووخەنوەر” تەمەن ٣٦ ساڵ، “شۆڕش عەبدوڵڵا نژاد” تەمەن ٣٧ ساڵ، “سەلاح ئاجی” تەمەن ٥٠ ساڵ و “ڕەحمانی ئاجی” تەمەن ٢٢ ساڵ، لە لایەن هێزە ئەمنییەکانەوە دەستبەسەر کران. هاوکات لەگەڵ دەستبەسەرکردنی ئەو ٤ هاووڵاتییە، هێزە ئەمنییەکان دوو هاووڵاتیی دیکەی خەڵکی گوندی “شێناوێـ”ـی شاری پیرانشاریان بە ناوەکانی “ئیسماعیل حاجی عەبدوڵڵا” و “عەلی جۆڵا” دەستبەسەر کردووه. له لایه‌كی دیكه‌وه، ڕۆژ شەممە ڕێکەوتی ٢٤ی گه‌ڵارێزان، هێزەکانی ئیدارەی ئیتلاعاتی شاری پاوە هاووڵاتییه‌كی خەڵکی ئەم شارەیان بە ناوی “نەبی وەیسی” دەستبەسەر و ڕاپێچی شوێنێکی نادیار كردووه.