ڕۆژی شه‌ممه ٢٦ی جۆزه‌ردان، هاووڵاتیه‌كی خه‌ڵكی بۆكان به ناوی “جه‌عفه‌ر(دارا) ئه‌مینی” له‌لایه‌ن هێزه ئه‌منیه‌كانه‌وه ده‌ستبه‌سه‌ر كرا.
به‌پێی زانیارییه‌كان، هێزه‌كانی حكوومه‌ت به بێ به‌ڵگه‌ی قه‌زایی هێرشیان كردووه‌ته سه‌ر ماڵی “جه‌عفه‌ر ئه‌مینی” و ناوبراویان به توندووتیژییه‌وه ده‌ستبه‌سه‌ر كردووه. به وته‌ی سه‌رچاوه‌كانی هه‌واڵ، به‌دواداچوونی بنه‌ماڵه‌ی جه‌عفه‌ر تا به ئه‌مڕۆ بێ ئاكام بووه و هیچ زانیارییه‌كیان له‌سه‌ر چاره‌نووس و شوێنی ڕاگیرانی ناوبراو ده‌ست نه‌كه‌وتووه. شایانی باسه كه “جه‌عفه‌ر ئه‌مینی” پێشتر و له ڕێكه‌وتی ٢٣ی ڕه‌شه‌مه‌ی ساڵی ٩٦ی هه‌تاوی، پاش به‌شداری كردن له كۆبوونه‌وه‌ی ناڕه‌زایه‌تی له ئاست هێرشی توركیا بۆ سه‌ر عه‌فرین ده‌ستبه‌سه‌ر و مانگی خاكه‌لێوه‌ی ساڵی ٩٧، به تۆمه‌تی “ته‌بلیغ دژی نیزام” به شه‌ش مانگ زیندان مه‌حكووم كرابوو.