لە درێژەى کاردانەوە نێونەتەوەییەکان سه‌باره‌ت به ژەهراویکردنى زنجیرەیی قوتابیانى كچ له ئێران، “ئانالێنا بێربۆک”، وەزیرى کاروبارى دەرەوەى ئاڵمان، نیگەرانى خۆى لەم بارەوە نیشان دا و خوازیاری لێكه‌وڵینه‌وه له‌سه‌ر ئه‌و ڕووداوه بوو.
وەزیرى کاروبارى دەرەوەى ئاڵمان، بە “شۆکهێنەر” ناوبردنى ڕاپۆرتەکان سه‌باره‌ت به هێرشى “شیمیایی” بۆ سەر کچانى قوتابی لە قوتابخانەکانى ئێران، تویتێکى بڵاو کردەوە کە تێیدا نووسیوە: “کچان دەبێت بتوانن بێ ترس بچنە قوتابخانە، چ لە تاران و چ لە هه‌ر شارێكی دیكه‌ی ئێران، ئەمە کەمترین مافی ئینسانی ئەوانه و هەموو کەیس و پەروندەكان دەبێت بە تەواوى تاوتوێ بکرێن”. له هه‌واڵێكی دیكه دا پزیشكانی ئێرانی دانیشتووی ده‌ره‌وه‌ی وڵات داوایان له ڕێكخراوی خاجی سوور كردووه سه‌باره‌ت به په‌روه‌نده‌ی ژه‌هراویكردنی قوتابیان له ئێران لێكۆڵینه‌وه‌كانی ده‌ست پێ بكات و یارمه‌تیده‌ری لاوانی ئێرانی بێت.