کۆمەڵە_رێكخراوی كوردستانی حیزبی كۆمونیستی ئیران
وتاری ڕۆژ

خەڵک نەتەنیا لەدژی گرانی، بەڵکوو خوازیاری بەدەستهێنانی سەرجەم مافە پێشێلکراوەکانی خۆیانن.

گرانی و کەمیی پێداویستییە سەرەتاییەکان، کاردیان بە ئێسقانی خەڵک گەیاندووە. کار بە جێگایەک گەیشتووە کە بەشێکی زۆر لە کۆمەڵانی خەڵک تەنانەت توانایی دابینکردنی نانی شەویان نییە و ماکارۆنی بۆتە کالایەکی قیمەتی و گوشت و ماسیش دەمێکە لەسەر سفرەی خەڵک نەماوە. خەڵک بەشێوەیەکی سروشتی و بەحەق، دژ بەم فەقر و هەژارییە بەرنامە بۆ داڕێژراوە، ناڕازین و ناڕەزایەتی خۆیان لەشکڵی ڕێپێوانی سەرشەقامدا بەیان دەکەن.

لەدەستپێکی سەرلەنوێی ناڕەزایەتییەکانی دژ بە حکوومەت لە ئێران، لانیکەم چوار کەس لەلایەن هێزە ئەمنییەتییەکانەوە کوژراون و سەدان کەسیش دەستبەسەرکراون. ئینترنێت لە هەشت ئوستانی فارس، ئەردەبیل، زەنجان، چوارمحاڵ و بەختیاری، کرماشان، لوڕستان، کوردستان و  ئەسفەهان بڕدراوە یان خێراییەکەی بەڕادەیەکی زۆر دابەزیوە و لە ئوستانی خوزستانیش لە دە ڕۆژ لەمەوبەرەوە تا هەنووکەش، ئینترنێت بوونی نییە. هێرشی چەکدارانەی بەکرێگیراوانی ڕژیم بۆسەر ڕیزەکانی ڕێپێوانی خەڵکی ناڕازی و بڕینی ئینترنێت و بەستنی کاناڵی پێوەندییەکانی خەڵک، کردەوەیەکی جینایەتکارانەیە و مەحکوومە.

بەڵام ئەمە، هەموو ئەو شتە نییە کە لەژێر توێی ئەم کۆمەڵگایەدا لەئارادایە. ئەو ناڕەزایەتییانەی کە لەم ڕۆژانەی دواییدا و لە شوێنە جۆراوجۆرەکانی ئێران ڕوودەدەن، وانیتە کە هیچ پێوەندییەکیان بە خەبات و ناڕەزایەتی بەشە جۆراوجۆرەکانی گۆمەڵگا لەم ساڵانەی دواییدا و بەشکڵ و شێوازێکی ترەوە نەبێت. ئەوانەی کە ئەو ئاخێزە جەماوەریانەی کە لەم یان لەو شار سەرهەڵدەدەن، بە تووڕەیی و هەڵچوونێکی کاتی و لەدژی گرانی هەوسار پچڕاو دەزانن، یان وەک دەوترێت بەشۆڕشی برسییەکانناوی لێدەبەن، ئه‌گه‌ر هیچ مه‌به‌ستێكی تایبه‌تی له‌پشت نه‌بێت، تەنيا دەرکی ڕواڵەتیی خۆیان لە هەلومەرجی ئێستای کۆمەڵگای ئێران نیشان دەدەن. دابەزاندنی جێگە و پێگەی خەباتی بەربڵاوی کۆمەڵانی خەڵکی ناڕازی لەدژی سەرەڕۆیی و وەحشیگەرییەکانی کۆماری ئیسلامی، تا ئاستیشۆڕشی برسییەکان، ئەگەر مەبەست بەرتەسک کردنەوەی بەشداری خەڵک لەو خەبات و ناڕەزایەتییانە نەبێت، لانیکەم نیشانەی نەبوونی دەرکێکی قووڵ سەبارەت بە بەربڵاوی و فرەچەشنی ئەو خەبات و بزووتنەوانەیە کە لەکۆمەڵگەی ئێراندا لەئارادان. موعەلیمان، خانەنشینکراوان، کرێکاران، ژنان، دانشجویان، خەڵکی ستەمدیتووی کوردستان و کەمینە ئایینی و نەتەوەییەکانی تر، لاوان، بێکاران، بنەماڵەی گیانبەختکردوان و زیندانیانی سیاسی، چەندین ساڵە بەشێوەی جۆراوجۆر لەدژی ئەم ڕژیمە دەستیانداوەتە خەبات و ناڕەزایەتی. بزووتنەوەی کرێکاران، موعەلیمان، خانەنشینکراوان و چین و توێژەکانی تری خەڵکی ناڕازی، لە شکڵی مانگرتن و کۆبوونەوەگەلێکی مەدەنیانە، ڕۆژ بە ڕۆژ ڕێکخراو تر بووە و ڕێبەرەکانی خۆی بەکۆمەڵگا ناساندووە. ئەوە تەنيا ناڕەزایەتی دەربڕین لەدژی گرانی بەنزین نەبوو کە لە ئابانی ٩٨دا خەڵکی پتر لە  ١٥٠ شاری ئێرانی هێنایە سەرشەقامەکان. کۆمەڵانی خەڵکی بێزار و وەگیانهاتوو لە دەسەڵاتی ئەم ڕژیمە، خوازیاری بەهرەمەند بوون لە ژیانێکی باشتر و شیاوی مرۆڤ و هەروەها خوازیاری دامەزراندنی کۆمەڵگایەکن کە ئینسانەکان تیایدا ئازاد و یەکسان و  تێر و تەسەل بن.

ناڕەزایەتییەکانی ئەم داوییانە لە دژی گرانی، جیا لە خەبات و ناڕەزایەتی کرێکارانی نەوتی باکوو، ڕێگای ئاسن و حەوت تەپە، فوولاد و هەروەها جیا لە بزووتنەوەی بەردەوام و بەربڵاوی موعەلیمان و خانەنشینکراوان و بزووتنەوەی پێشڕەوی دانشجویی نییە. بەرتەسک کردنەوەی ناڕەزایەتییەکانی ئێستا لەچوارچێوەی ناڕەزایەتی خەڵکی برسیدا، نیشانەی دەرکێکی نادرووست و ڕواڵەتییە لە جەوهەر و پاڵنەری ئەم خەبات و ناڕەزایەتییانە. ئەوەی کە خەڵک داوایدەکەن، گەلێک پێداویستی سەرەتایی ئابووری، سیاسی و کۆمەڵایەتی لەخۆ دەگرێت.

گرانی، بێکاری، هاتنەخوارەوەی توانایی کڕینی خەڵک، نەبوونی خزمەتگوزاری گشتی و لەوانە بیمەی بێکاری، دەرمانی و دابینکردنی هەزینەی خانووبەرە، گوشارێکی قورس و لەتاقەت بەدەری خستۆتە سەرشانی جەماوەری ملیۆنی کرێکار و زەحمەتکێش و توێژی مامناوەندی کۆمەڵگا. کەمبوونی ئاوی خواردنەوە، کەمیی بەرق، بەرزبوونەوەی لەڕادەبەدەری هەزینەکانی دوکتۆر و دەرمان، نەبوونی ئەمنییەت و ئاسایش و رەها کردنی لات و چەقۆکێشە ئاتەش بەئیختیارەکانی سەربە حکومەت لە شەقامەکان و هیترهەمووی

ئەمانە بەشێوەیەکی گشتی کاردیان گەیاندۆتە سەرئێسقانی خەڵک.

هاوکات و هاوتەریب لەگەڵ ناڕەزایەتییەکان لەدژی بێکاری و گرانی، دروشم و داواکارییەکانی خەڵک ئازادییە سیاسی و کۆمەڵایەتیەکان، نەهێشتنی ستەم و هەڵاواردن لە دژی ژنان، نەهێشتنی ستەم لەدژی کەمینە ئایینی و نەتەوەییەکان، ئازادی و بەرتەسک نەکردنەوەی ڕۆژنامەوانان و نووسەران، لابردنی سانسۆر، کۆتایی هێنان بە زیندانیکردنی موعەلیمان و هەڵسوڕاوانی کۆمەڵایەتی، ئازادی سەرجەم زیندانیانی سیاسی، کۆتایی هێنان بە تیرۆریسم لە دەرەوەی وڵات، کورت کردنەوەی دەستی ئاخوندەکان و دام و دەزگای مەزهەبیی شیعە لەدەسەڵات و پێشگرتن لە بەتاڵانبردنی سەروەت و سامانی گشتی لەلایەن بەرپرسە حکومی و مەزهەبییەکانەوە، لەهەموو خەبات و ناڕەزایەتییەکاندا بەئاشکرا خۆی نیشان دەدات. ئازادی، یەکسانی و خۆشگوزەرانی، جیایی دین لە دەوڵەت و جیایی دین و ئایین لە فێرکردن و بارهێنان،  نەهێشتنی ئەشکەنجە و ئێعدام و ئازادی خێرا و بێ شەرت و مەرجی سەرجەم زیندانیانی سیاسی، ناکرێت لە خەباتی خەڵک لەدژی گرانی جیا بکرێتەوە. ئەو جەماوەرەی کە ئەمڕۆ لەدژی هەڵاواردن و هەژاریی بەرنامە بۆ داڕێژراو ناڕەزایەتی دەردەبڕن، هاوکات خوازیاری بەدەستهێنانی مافەکانی خۆیان لەسەرجەم بوارەکاندان.

بابەتی پەیوەندیدار

كۆماری ئیسلامی و هه‌وڵی به‌ تاڵه‌بانیكردنی هه‌رچی زیاتری كۆمه‌ڵگا

komalah

خانه‌نشینكراوان یه‌كگرتووتر و شێلگیرتر له‌ هه‌میشه‌

komalah

كۆماری ئیسلامی و دوو به‌رابه‌ر بوونی ڕێژه‌ی ئێعدامه‌كان له‌ ماوه‌ی سێ ساڵدا

komalah

خامنه‌یی و ئاره‌زووی نامومكین و كۆنه‌په‌ره‌ستانه‌ی، گه‌ڕانه‌وه‌ بۆ ده‌یه‌ی شه‌ست

komalah

دەست لە پیلانگێڕیی هەڵگرن، هەڵسووڕاوانی کرێکاریی و موعەلیمان ئازاد بکەن.

komalah

ڕێكخراوی موجاهدینی خه‌ڵك و هه‌زینه‌ی زۆر و زه‌وه‌ندی ته‌بلیغاتی

komalah