ڕۆژی دووشه‌ممه ٢ی گه‌لاوێژ و هاوكات له‌گه‌ڵ ده‌نگدان به لایه‌حه‌ی چاكسازی قه‌زایی ده‌وڵه‌تی ڕاستگه‌رای “بنیامین نتانیاهوو”، هه‌زاران شارۆمه‌ندی ئیسڕائیلی له ئورشه‌لیم و تل ئاویو ڕژانه سه‌ر شه‌قام و خۆپێشاندانیان كرد.
به‌پێی ڕاپۆرته‌كان، لایه‌حه‌ی چاكسازی یاسای قه‌زایی ئیسڕائیل به ٦٤ ده‌نگی ئه‌رێ و وێڕای ناڕه‌زایه‌تی چه‌ند مانگه‌ی خه‌ڵكی ئه‌و وڵاته په‌سه‌ند كراوه. خه‌ڵكی ناڕازی ده‌رگای پاڕله‌مانیان داخستووه و شه‌قامه‌كانی ده‌ورووبه‌ری “كنێسێت”یان به‌ستووه. هه‌ر چه‌ند پۆلیس هه‌وڵی خۆی دا كۆبوونه‌وه‌ی خه‌ڵك تێك بدات به‌ڵام نه‌یتوانی و هه‌زاران خۆپێشانده‌ر به وتنه‌وه‌ی دروشم دژایه‌تی خۆیان له‌گه‌ڵ ده‌وڵه‌ت نیشان دا.