به‌پێی ڕاپۆرته‌كان، ساڵانه یه‌ك ملیۆن تۆن گه‌نم به‌هۆی كۆن بوونی كۆمباین و تراكتۆر له سه‌رانسه‌ری ئێران به خه‌سار ده‌چێت.
به‌وته‌ی به‌ڕێوه‌به‌رایه‌تی كۆمباینسازی ئێران، ٨ هه‌زار ده‌زگا كۆمباینی كۆن و ناكارامه له سه‌رانسه‌ری ئێران كار ده‌كه‌ن و ساڵانه یه‌ك ملیۆن تۆن گه‌نم خه‌سار ده‌كه‌ن، له حاڵێكدا ئه‌و یه‌ك ملیۆن تۆن گه‌نمه نانی پێنج ملیۆن كه‌س دابین ده‌كات. بڵاوبوونه‌وه‌ی ئه‌و هه‌واڵه ده‌نگدانه‌وه‌ی زۆری له نێو كۆمه‌ڵگای ئێران به‌دوای خۆی دا هێناوه و چالاكانی ئابووری ده‌ڵێن: سه‌رده‌مێك گه‌وره‌ترین به‌رهه‌مهێنه‌ری كۆمباین و تراكتۆر له شاره‌كانی ته‌ورێز و ئه‌راك له ڕۆژهه‌ڵاتی ناوه‌ڕاست بووین كه چی ئێستا ئه‌و شیركه‌تانه له مایه‌پووچ بوون نزیك بوونه‌ته‌وه.