به‌پێی ڕاپۆرتی ئیتحادییه‌ی ئازادی كرێكارانی ئێران، باری ته‌ندرووستی “ئاره‌ش جه‌وهه‌ری” چالاكی كرێكاری به‌ندكراو له زیندانی ئێڤین ناجێگیره و پێویستی به ده‌رمان له ده‌ره‌وه‌ی زیندان هه‌یه به‌ڵام به‌رپرسانی زیندان ڕێگری لێ ده‌كه‌ن.
“ئاره‌ش جه‌وهه‌ری” دوو ساڵ و ١٠ مانگ له ماوه‌ی زیندانه‌كه‌ی تێپه‌ڕ كردووه و به‌پێی یاسا مافی ئازادی مه‌رجداری هه‌یه به‌ڵام به‌رپرسانی زیندان له ده‌ستڕاگه‌یشتن به ده‌رمان بێبه‌شیان كردووه. ئه‌و چالاكه كرێكارییه له ڕێكه‌وتی ١٥ی ڕه‌زبه‌ری ساڵی ٩٩ی هه‌تاوی له‌لایه‌ن ئیتلاعاتی سپای پاسداران له ماڵه‌كه‌ی دا ده‌ستبه‌سه‌ر و ڕاگوێزی گرتووخانه‌ی ئه‌و ناوه‌نده ئه‌منیه‌تیه له به‌ندی ٢ی (الف)ی زیندانی ئێڤین كرا. ناوبراو له مانگی به‌فرانباری ٩٩ له‌لایه‌ن لقی ٢٦ی دادگای ئینقلابی تاران به سه‌رۆكایه‌تی قازی ئه‌فشاری به تۆمه‌تی “پێكهێنانی گرووپی نایاسایی به مه‌به‌ستی تێكدانی ئاسایشی وڵات” به ده ساڵ زیندانی ته‌عزیری، به تۆمه‌تی “ئیجماع و ته‌بانی” به پێنج ساڵ و به تۆمه‌تی “چالاكی ته‌بلیغی دژی نیزام” به یه‌ك ساڵ زیندانی ته‌عزیری مه‌حكووم كرا، به‌ڵام ئه‌و حوكمه دواتر بۆ ٧ ساڵ و شه‌ش مانگ كه‌م كرایه‌وه.