بەپێی ڕاپۆرتی ناوەندیی مافی مرۆڤی ئێران، دوو هەفتە بەسەر مانگرتنی “سالار سدیق هه‌مه‌دانی” و “ئیبراهیم سدیق هه‌مه‌دانی” لە بەندیخانەكانی سەڵماس و مه‌ریوان تێدەپەڕێت و باری تەندروستیان ناجێگیر ڕاگەیێندراوە.
به‌پێی ئه‌و ڕاپۆرته، “سالار سدیق هه‌مه‌دانی” لەبەرپرسانی زیندان داوایکردووە باوکە پیر و نەخۆشەکەی کە لە زیندانی مەریوان به‌ندكراوه، بگوازرێته‌وه بۆ زیندانی سەڵماس هەتاکوو بتوانێت چاودێری تەندروستی بکات و ئاگای لێ بێت. ئەو هاووڵاتییە به‌هۆی پشتگوێخرانی داواكارییه‌كه‌ی له‌لایه‌ن به‌پرسانی زیندانه‌وه، لە ڕێکەوتی ١٦ی گەلاوێژی ئه‌مساڵه‌وه مانی لە خواردن گرتووە و دوو هەفتە بەسەر مانگرتنەکەیدا تێدەپەڕێت. لەهەمانکاتدا باوكی ناوبراو لە ڕێکەوتی ١١ی گەلاوێژه‌وه لە زیندانی مەریوان مانی لە خواردن گرتووە و هێزه ئه‌منییه‌كانی زیندان گواستوویانه‌ته‌وه بۆ به‌ندی تاكه‌كه‌سی و ئێستا مه‌ترسی له سه‌ر ژیانی درووستبووه.