به پێی ڕاپۆرتی ڕێكخراوی مافی مرۆڤی هەنگاو، لە ئەنجامی شەڕ و تێکهەڵچوونێكی چەکدارانە لە سنووری ورمێ کە لە نێوان هێزەکانی پاسەوانی سنووری ئێران و هێزەکانی یەکێک لە حیزبە ئۆپۆزیسیۆنه‌كانی حکوومەت ڕوویدا، لانی کەم حەوت کەس لە هێزەکانی پاسەوانی سنوور کوژران و بریندار بوون.
بە پێی ئه‌م ڕاپۆرته، کاتژمێر ٢ی دوانیوەڕۆی ڕۆژی هەینی ٢٣ی گه‌ڵارێزان لە چیا سنوورییەکانی ناوچەی سیلوانای سەر بە شاری ورمێ ، شەڕ و تێکهەڵچوونێکی چەکداری لە نێوان یەکێک لە حیزبە ئۆپۆزیسیۆنه‌كانی حکوومەتی ئێران و هێزەکانی پاسەوانی سنووری کۆماری ئیسلامیی هاتووەتە ئاراوە و کەمتر لە یەک کاتژمێری خایاندووە. لە ئەنجامی ئەم تێکهەڵچوونەدا سێ ئەندامی هێزه‌كانی پاسەوانی سنوور کوژراون و چوار ئەندامی دیکەش بریندار بوون. بەڵام سەرچاوە حکوومییەکان ژمارەی بریندارەکانیان ٢ کەس ڕاگەیاندووە. ئه‌مه له‌كاتێكدایه كه هه‌تا کاتی ئامادە کردنی ئەم هەواڵە، هیچكام له حیزبه‌كانی ئۆپۆزسیۆن، بەرپرسایه‌تی ئەم شەڕەیان نەگرتووەته ئەستۆ.