لە سەرەتای دەستپێکی چوارەم مانگی شۆڕشی” ژن، ژیان، ئازادی” داین، کە ناوی ژینا ئەمینی بوو بە ڕەمزی بەرپا بوونی. حکومەتی ئیسلامی هەرچیەکی لە توانایدا بوو بۆ ڕاگرتن و شکست پێ هێنانی ئەم ماراتۆنە شۆڕشگێڕانەیە کردی و ناکام مایەوە. ئێعدام، قەتڵی خیابانی و تیرۆر تەنیا شگرد و بژاردەی حکومەتە بۆ بەرەنگار بوونەوەی خەڵکی ڕاپەڕیو. بەڵام لە بارودۆخێکدا کە کوشتنە بە ئاشکرا حکومەتیەکان هەزینەیەکی زۆری هەیە بۆیان، هاوکاتیش دەستیان داوەتە شێوازێکی داماوانە تر. ڕفاندنی ناڕازیان و زیندانی کردنیان لە زیندانە شاراوەکان و کوشتنیان لەژێر ئەشکەنجەدا و فڕێدانی پەیکەرەکانیان بۆ نێو دەریاچە و ڕوبارەکان، بۆنێو دەشت و قەراغ جادەکان. کۆماری ئیسلامی سیاسەتی جەنایەتکارانەی ڕفاندن، تیرۆر و کوشتنی لە دەیەکانی ڕابردوشدا لە بەرانبەر نووسەران، هونەرمەندان و ژمارەیەک لە نەیارانی سیاسی دا گرتبوەبەر. لە ڕاستیدا ئەمە هەمان سیاسەتی ڕیسوا بووی قەتڵە زنجیرەییەکانە کە ڕژیم بە شاراوەیی بەڕێوەی ئەبرد و حاشای لێدەکرد.
بەڵام تیرۆر، کوشتنە حکومەتیەکان لەسەر شەقام و ئێعدام کردن لەنێو زیندانەکاندا، ماراتۆنی ئەم بزوتنەوە کۆمەڵایەتیەی خاو نەکردۆتەوە و ناشتوانێ ڕایبگرێت. بە قەتڵی حکومەتی ژینا ئەمینی قین و تورەیی کەڵەکە بوو لەژێر پێستی شار و کۆمەڵدا سەری هەڵدا. بەڵام لەم ماوە کورتەدا شاهیدی بەرپا بوونی شۆڕشێکی بەهێزی سیاسین کە هاوکات گەلێک لە پێوەندیە کۆن و پەڕتوکاوی کۆمەڵایەتیشی کردۆتە ئامانج. ئامادە بوونی بەرینی ژنان کە بۆیەکم جارە لە مێژوی ئێراندا لە لایەن پیاوانی بەرابەری خوازیشەوە پشتیوانی دەکرێت، لە ئاستی ناوچەکە و دنیادا بێ وێنەیە.
شۆڕشی ١٣٥٧ کە لەلایەن جەریانی مەزهەبیەوە دەستی بەسەردا گیرا و حکومەتی مەزهەبی شیعەی هێنایە سەرکار، لەسەر خوێن، شەڕ، تازیەباری، سینەزەنی، مردن و شەهادەت، بێگانە هەراسی و نەفرەت لە هەرشتێکی مۆدێڕن، ئەمڕۆیی و زانستی بوو، دامەزرا. شۆڕشی ژینا ڕاست بە پێچەوانە و بۆ سڕینەوەی هەموو دزێویە کۆمەڵایەتی و سیاسیەکانی سەرچاوە گرتوو لە بە دەسەڵات گەیشتنی حکومەتی مەزهەبی بەرپا بووە.
لە شۆڕشی ژینادا دروشمی ژن، ژیان، ئازادی ڕەنگدانەوەی خواست و ئاواتەکانی زۆربەی خەڵکی ئێرانە. ئەو چەمکانەی کە ڕاست دژ و پێچەوانەن لەگەڵ فەرهەنگی کۆنەپەرستانەی دامەزراو لەسەر نایەکسانی ژن و پیاو.
لە شۆڕشی ژینادا تەنیا پەڕاوێز خستن، لاواز کردن و سەرئەنجام شکاندنی شکۆ و دەسەڵاتی مەزهەبی ئامانج نییە بەڵکو تێکشاندن و سڕینەوەی پیرۆزیە لە هەرشتێک کە بۆتە سیمبول و هێمای پایەداری و بەهێز بوونی مەزهەب.
شتێک کە هیوا بە سەرکەوتنی شۆڕش لە دڵدا دەبووژێنێتەوە، بەردەوامی حوزوری ژنان و لاوان، کرێکاران و زەحمەتکێشان، خوێندکاران و قوتابیان، هونەرمەندان و وەرزشکاران، فەرهەنگیان و خانەنشینان، و بەکورتی بەشێکی بەرین لە دانیشتوانی کۆمەڵگایە لە ماوەی ٣ مانگی ڕابردودا. ئاستی جەماوەری بوونی ئەم بزوتنەوەیە بەتایبەت لە کوردستان و بەلوچستان بێ وێنەیە. ئێستا ئەم بزوتنەوە کۆمەڵایەتیە گەورەیە بەرەو ئەوە دەچێت تا جەماوەری بەرینی کرێکاران لە ناوەندە گەورەکانی بەرهەمهێناندا لەخۆ بگرێت و ئەم ڕاستیەش زەنگی مەرگی ڕژیمی لێداوە.
ماراتۆنی بزوتنەوەی جەماوەری بۆ ئاڵوگۆڕی جیدی و قوڵی کومەڵایەتی و سیاسی، و دەستەبەر کردنی ئازادی، دادپەروەری و یەکسانی بە ئێعدام و تیرۆر ڕاناوەستێت. شۆڕشی ژینا بەرەو ئەوە دەچێت کە نەک تەنیا ئێران، بەڵکو ناوچەکەش بۆ حکومەتە مەزهەبی و ئیستبدادیەکان بەرتەسک و نائەمن بکات. بە دەسەڵات گەیشتنی ڕژیمی ئیسلامی لە ئێران بوو بەهۆی پێكهاتنی تالیبان، داعش، حیزبۆاللە و باقی ڕەوتە کۆنەپەرستە مەزهەبیەکانی شیعە و سوننی لە ناوچەکەدا. ئەم شۆڕشە ڕاست بە پێچەوانەی ئەو، ناوچەکەی بۆ ڕەوتە کۆنەپەرستە مەزهەبیەکان نائەمن کردوە و موژدەدەری ئاڵوگۆڕی قوڵی کۆمەڵایەتی، فەرهەنگی و سیاسییە لە داهاتودا.