ڕۆژی سێشه‌ممه ٢٩ی جۆزه‌ردان، خوێندكارانی كوردستان و ئێران بۆ بایكۆتكردنی هه‌ڵبژاردنه‌كانی سه‌رۆككۆماری به‌یانیه‌یه‌كیان بڵاو كرده‌وه.
خوێندكاران و قوتابیانی كوردستان و ئێران له به‌یانیه‌كانیاندا دووپاتیان كردووه‌ته‌وه كه ده‌نگی ئه‌وان ته‌نیا شۆڕشی ژن،ژیان،ئازادیه و له شانۆی هه‌ڵبژاردنی سه‌رۆككۆماری دا به‌شداری ناكه‌ن. له به‌شێكی ئه‌و به‌یاننامانه‌دا هاتووه، له حاڵێكدا كچان و ژنانی وڵات له‌سه‌ر شه‌قه‌كامه‌كان سه‌ركوت ده‌كرێن، به‌ندكراوان له زیندان دا ئێعدام و چالاكانی كرێكاری، سیاسی، سنفی و مه‌ده‌نی زیندانی كراون، به‌شداری له هه‌ڵبژاردن خه‌یانه‌ت به خوێنی هه‌موو گیانبه‌ختكردووانی ڕێگای ئازادییه. باشترین ڕۆڵه‌كانی ئه‌و وڵاته له‌سه‌ر شه‌قامه‌كان دا كوژران و قه‌د له بیریان ناكه‌ین و ده‌نگ به حكوومه‌تی جه‌نایه‌تكاری ئیسلامی ناده‌ین.