ڕۆژی سێشه‌ممه ٨ی ڕه‌شه‌مه، كاسبكارێكی خه‌ڵكی سه‌رده‌شت به ناوی “كاوه سه‌ڕاف” ناسراو به “كاوان ئه‌مجه‌دی نیا” به ده‌ستڕێژی گوله‌ی سه‌ركوتگه‌رانی سپای پاسداران كوژرا و ته‌رمه‌كه‌ی به به‌شداری به‌رینی خه‌ڵك ئه‌سپه‌رده‌ی خاك كرا.
ئۆتۆمبێلی “كاوان ئه‌مجه‌دی نیا” ڕۆژی سێشه‌ممه له بازگه‌ی پشكنینی نێوان گونده‌كانی “گۆڕه‌شێر” و “ساوان” له‌لایه‌ن هێزه‌كانی سپای پاسدارانه‌وه ده‌رایه به‌ر ده‌سترێژی گوله و له ئاكامی ئه‌و هێرشه‌دا، ناوبراو گیانی له‌ده‌ستدا. كوشتنی ئه‌و كاسبكاره ناڕه‌زایه‌تی به‌رینی دانیشتووانی گونده‌كانی “میراوێ”، “ساوان” و “گۆڕه‌شێڕ”ی لێكه‌وته‌وه و هێزه‌كانی بنكه‌ی سپای پاسدارن له ترسی تۆڵه‌سه‌ندنه‌وه‌ی خه‌ڵك، ئه‌و فه‌رمانده كه ته‌قه‌ی له كاوان كردبوو بۆ شوێنێكی دیكه گواسته‌وه.