ڕۆژی شه‌ممه ١ی ڕه‌زبه‌ری ١٤٠٢، مه‌راسمی ساڵڕۆژی گیانبه‌ختكردنی “ڕوزبه خادمیان” له شاری كه‌ره‌ج به به‌شداری بنه‌ماڵه و كۆمه‌ڵێك له خه‌ڵكی ئازادیخواز به‌ڕێوه چوو.
باوكی ئه‌و گیانبه‌ختكردووه‌ی ڕێگای ئازادی له‌سه‌ر مه‌زاری ڕۆڵه‌كه‌ی نووسی: “ڕوزبه گیان، كوڕه ئازا و به‌شه‌ره‌فه‌كه‌م، یه‌ك ساڵ به‌سه‌ر كاتی گیانبه‌ختكردنت دا تێپه‌ڕ ده‌بێت، یه‌ك ساڵه كه نیت به‌لامانه‌وه، پشتم شكا به‌ڵام تا هه‌تاهه‌تایه ناوت زیندووه و یاد و بیره‌وه‌رییه‌كانت بۆ هه‌میشه ده‌مێنێته‌وه”. جێگای ئاماژه‌یه كه ڕۆژی ٣٠ی خه‌رمانان ساڵڕۆژی گیانبه‌ختكردنی “ڕوزبه خادمیان” بوو به‌ڵام هێزه ئه‌منیه‌كان ڕێگه‌یان نه‌دا كه‌سوكاری له‌سه‌ر مه‌زاری ناوبراودا كۆببنه‌وه.