×

مێنۆی سه‌ره‌وه‌

مێنۆی سه‌ره‌كی

ده‌ستڕاگه‌یشتنی خێرا

هه‌واڵی ماڵپه‌ڕ

false
true
false

2018-06-27 | ۱۳۹۷-۰۴-۰۶

سەروتار

 

دەورێكی نوێی ئاخیزی جەماوەری لەسەر شەقامەكان دەستی پێ كردۆە. ئەم حەرەكەتە ئەگەر چی لەبازاری تارانەوە و دوابەدوای مانگرتنی بازاریان دژ بە بێ سەرەوبەرەیی قیمەت دۆڵار و داشكانی خێرای ئەرزشی پارەی ئێران سەری هەڵدا، بەڵام خێرا بەپەیوەست بوونی خێڵی لاوان بە ریزی خۆپیشاندرانی بازار، ئاراستەیەكی دژ بەدەسەڵاتی بەخۆییەوە گرت و هەر وەكوو چاوەروان دەكرا ناوەرۆكی درۆشمەكانی گۆرا. ژمارەیەك لە رۆژنامەنووسانی رۆژئاوایی لە لێكدانەوەی هۆكاری ئاخیزی ئەم رۆژانەی دوایی، نووسیان كە ئەمە یەكێك لەئاكامەكانی هاتنە دەری دەوڵەتی ئەمریكا لە رێككەوتنامەی بەرجامە. بەڵام لەراستیدا دەوری تازەی ناڕەزایەتیی جەماوەری دژبە گرانی، بێكاری و هەژاری نە لەگەڵ كێشەی كۆماری ئیسلامی لە سەر بەرجام دەستی پێ كردووە و بێ گومان نە بە چارەسەر بوونی گرفتی ڕژیم لەگەڵ دەوڵەتانی رۆژئاوایی و ئەمریكا كۆتایی پێ دێت. ئاخێزە جەماوەریەكەی مانگی بەفرانباری ڕابردوو كە ئەوكات زیاتر لە ١٢٠ شاری ئێرانی گرتەوە، لە بارودۆخێكدا روویاندا كە هێشتا دەوڵەتی ئەمریكا لە بەرجام نەكشابۆوە و ڕژیمیش هەناردەی نەوتی خۆی بەبێ كێشە لە بازاڕەكانی دنیادا دەفرۆشت. ئاشكرایە كەڕیشەی ئەم ناڕەزایەتیانە لە هەژاریەكی كەم وێنە كە كۆماری ئیسلامی بەسەر زۆربەی هەرە زۆری خەڵكی ئەم وڵاتەیدا سەپاندوە، دایە. ئەگەر بازاڕیان ماندەگرن، ئەساسەن بەم هۆیەیە كە دابەزینی توانایی كڕینی كرێكاران و زۆربەی هەرەزۆری خەڵك، كەسب وكاری ئەوانیشی لە ڕەونەق خستوە.

كاتێك ئاخێزی جەماوەری مانگی بەفرانبار لە ئاكامی سەركوتی بەرینی دوژمندا، بەڕواڵەت دادەمركێتەوە، بە شوێنیدا شەپۆلێك لە مانگرتن و ناڕەزایەتیی دەربڕینی كرێكاری و جەماوەری یەك لە دوای یەك دەكەوێتە ڕێ. ئەو مانگرتنانەی دوای مانگی بەفرانبار یەك هەنگاو لەپێش مانگرتنەكانی ڕابردوەوە بوون و بەرە بەرە شێوەی هاوئاهەنگ و سەرتاسەریان بە خۆیانەوە گرت. جێگای بەتاڵی ئاخیزی سەرشەقام، تا پێك هاتنی بارودۆخی لە بار بۆ ئاخێزێكی تر بە مانگرتن لە ناوەندە كرێكاریەكاندا پڕ كرایەوە. شۆفیر كامیۆنەكان و كامیۆندارانی مامناوەند، كرێكارانی بەشە جۆراو جۆرەكانی ڕێگای ئاسن گۆشەیەك لە توانایی هێزی سەرتاسەری خۆیان پیشانی ڕژیمدا. دیسان دەرفەتێك هاتەبەرەوە و خەڵكی كازرون و ئەهواز لەدژی ڕژیم ڕاپەڕین. هێشتا ڕژیم لە كابوسی ئەم ئاخێزانە ڕزگاری نەهاتبوو كە كرێكارانی فولادی خوزستان، بە مانگرتن و خۆپیشاندانی بەرین، بەشێك لە داخوازیەكانیان بەسەر ڕژیمدا سەپاند. خوێندكاران بە لایەنگری لە هاوڕێیانی زیندانی كراویان لە ئاخێزی مانگی بەفرانباردا دەنگی ناڕەزایەتییان هەڵبڕی. بەم جۆرە دەبینین كە ئەم ئاگرەی ژێر خۆڵەمێش هەر رۆژە و لە گۆشەیەكەوە بڵێسە دەستێنێ.

بەڵام كۆماری ئیسلامی بەرانبەر بەم بارودۆخە دەست بەستراو و داماوە. تا ئەو جێگایەی كە سەرلەشكر ڕەحیم سەفەوی فەرماندەی پێشوی سپای پاسداران و ڕاوێژكاری ئێستای خامنەیی لە كاروباری نیزامیدا لە ئاماژەیەكدا بە بارودۆخی ئێستا لە ئێران دەڵێ: “هێندێك جار وا بەزەین دەگات ئەگەر دەوڵەت نەبێت، وڵات باشتر بەڕێوەدەچێت.” ! بێتوانایی لە كۆنترۆڵ كردنی نرخی ئەرز بە روونی نیشانی ئەدات كە ڕژیم توانایی ئەنجامدانی ڕیفۆڕمی ئابووری بۆ هێور كردنەوەی كەش و هەوای ئالۆزی كۆمەڵگای ئێران نییە. لەم روەوە ڕێگای خۆی هەڵبژاردوە و ئەویش هیچ شتێك نییە بێجگە لە پشت گۆی خستنی داخوازیەكانی جەماوەر و بەكارهێنانی توانایی سەركوت لەدژی خەڵكی ناڕازی. بەڵام كاریگەری سەركوتیش بەرتەسك بۆتەوە. ڕژیم لە بواری سەركوت و فریودا لە ماوەی ٤ دەیەی ڕابردودا هەرچی لە توانایدا بووە كردویەتی. بە شێوەیەك كە ئەمڕۆ ئیتر نە دانی وادەی سەرخەرمان، وە نە تاشینی دوژمنی دەرەكی، نە دەستەو دامێنی فریودانی مەزهەبی بوون و نە سەركوتی ڕاستەخۆ، هیچكامیان ڕێگا چارەی ڕژیم نین بۆ دەرچوون لە قەیرانێك كە تێیكەوتوە. خەڵكی ئێران بۆ نان و بۆ ئازدی هاتونە مەیدان و عەزمی خۆیان بۆ دەستەبەر كردنی ئەم ئامانجە جەزم كردوە. بزوتنەوە پێشڕەوە كۆمەڵایەتیەكان، بزوتنەوەی كرێكاری، بزوتنەوەی ژنان، بزوتنەوەی لاوان و خوێندكاران و بزوتنەوەی شۆڕشگێڕانەی خەڵكی كوردستان، ئەو كۆڵەكە ستراتیژیكانەن كە دەتوانن خەباتی ڕەوا و مافخوازانەی ئێستا جەماوەری خەڵك بە ئاراستەی ڕزگار بوونی یەكجاری ئەم كۆمەڵگایە لە چەوساندنەوە و ستەم دا بەرن. قوڵ بوونەوەی ڕادەی وشیاری، بە ڕێكخراو بوون، حەرەكەتی هاوئاهەنگ، پتەو كردنی ڕێبەریی، ئەمانە بە گشتی بەرهەمی درێژەی ئەم خەباتە دەبن. ئەگەرچی تاكتیكەكانی وەها خەباتێك بە شێوەی سروشتی جۆراو جۆر و مونعەتف دەبێت، بەڵام لە كۆتاییدا دەبێ بتوانێ هێزی ڕژیم ماندوو هێلاك بكات و ئەوان لە سەركوتی ڕاستەخۆ، رۆژ لەگەڵ رۆژ بێ تواناتر بكات. شور و شەوقێك كە كەوتووتە ڕێ، پێویستە لەگەڵ ووشیاری و كاری بیر لێكراوە و بەرنامە بۆ داڕێژراو تێكەڵ بكرێ. كاری ڕێكخراو لەگەڵ هەنگاوی تاكتیكی و سیاسی ئاگاهانە بە پشت بەستن بە ئەزمونی ڕابردوو، بەرەو پێشەوە بردنی ئەو بزوتنەوە كۆمەڵایەتیە پێشڕەوانەی كە ڕژیم بە ئاسانی لەنێویاندا توانایی و ئیمكانی مانۆڕ و ترساندنی خەڵكی نییە، ئەمانە دەتوانن سەرئەنجام ڕژیم بەچۆكدا بێنن. توانایی لە گۆڕینی تاكتیك لە كاتی خۆیدا واتای ئەوەیە، ئەوەی كە ناوی دەندرێت دامركانەوەی خۆپیشاندانەكان، دەستپێكی فازێكی تربێت لە خەبات و خۆڕاگری خەڵك بۆ دەستەبەر كردنی هەمان ئامانج كە لە فازی یەكەمدا بۆی ڕژابوونە سەر شەقامەكان. ئەزمونی خەڵكی تێكۆشەر تاكتیك و حەرەكەتی جۆراو جۆری تێدایە. ئەوەی كە لە ماوەی دوو حەفتەی ڕابردودا بینیمان، تەنیا چاوەیەك لە هێزی لە بن نەهاتوی جەماوەری خەڵكی خوازیاری نان و ئازادی بوو. هێشتا كارێكی زۆر ماوە كە دەبێ بكرێت.

true
Tags :

ئه‌م بابه‌ته‌ بێ ته‌گ دانراوه‌.

true
true
true

ئێوه‌یش ده‌توانن ڕای خۆتان تۆمار بكه‌ن


- بابەتێک لێرە نییە-


false